Foto hamutuk membru MOKATIL iha enseramentu Asembleia Traballu Nasionál MOKATIL ba da-sia ne’ebé realiza iha CCD iha sábadu (29/02). Imajen/Natalino Costa

DILI, 29 fevereiru 2020 (TATOLI) – Asembleia Jerál Traballu Nasionál Movimentu Kamponez Timor-Leste (MOKATIL) ba da-sia tinan ne’e, partisipante membru kamponez husi munisípiu 12 inklui Rejiaun Administrativa Espesiál Oé-Cusse (RAEOA) halo votasaun hodi define produtu sira ne’ebé kamponez prodús inklui presu Batar Fo’os Kay Rala ka Sorghum.

Prezidente MOKATIL, Hélio Soares da Silva, informa partisipante ne’ebé maioria husi membru  MOKATIL rasik, fó votu unanimilidade no konsege aprova produtu sira ne’ebé maka MOKATIL hamutuk to’os-nain sira prodús.

“Ohin orgullu boot ba ami membru MOKATIL, liuhosi Asembleia Jerál tinan ne’e ho votu unamilidade, konsege halo aprovasaun hosi define presu produtu ne’ebé maka ita rasik prodús hanesan Batar Kay Rala ka Sorghum, liuhosi ita ninia kamponeza sira hamutuk ho ita nian to’os-na’in sira”, dehan Hélio ba Agência TATOLI hafoin ramata Asembleia Jerál Traballu MOKATIL nian ba da-sia, ne’ebé realiza iha Sentru Konvensaun Dili (CCD-sigla portugés), sábadu ne’e.

Nia realsa, liuhosi eventu ne’ebé realiza durante loron-rua ne’e, membru sira la’ós de’it halo aprovasaun ba presu produtu Sorghum, maibé mós halo aprovasaun ba rezolusaun balun ne’ebé fó podér ba membru sira atu halo serbisu iha baze.

“Ha’u sente ho rezolusaun sira ne’e, bele enkoraja membru MOKATIL sira iha baze atu hala’o serbisu ho di’ak, liuliu hasa’e produsaun di’ak liután iha rai-laran no bele fó benefísiu ba membru rasik no ba iha povu sira”, nia akresenta.

Nune’e, rezolusaun ne’ebé MOKATIL halo durante asembleia no hetan aprovasaun maka hanesan:

  1. Presu produtu fini Batar Fo’os (BAFO) Kay Rala ka Sorghum nian ne’ebé fa’an iha merkadu $1,50.
  2. Sorghum ne’ebé  halo prosesamentu hodi konsumu direita 0,30 sentavu.
  3. Sorghum ne’ebé sai fornesimentu Ai-han ba animál 0,50 sentavu.
  4. Sorghum ne’ebé bele sai fo’os Kay Rala hodi konsumu 0,55 sentavu.
  5. Sorghum ne’ebé sai Ai-farina ho presu 0,75 sentavu.
  6. Sorgum ne’ebé ba prosamentu sai masin-midar ho ninia presu 0,50 sentavu.
  7. Harii organizasaun juventude no organizasaun kamponez.
  8. Harii organizasaun feto kamponez.
  9. Rezolusaun ba justisa no klimátika.

Hélio promete katak ho kestaun sira ne’ebé maka aprova ona iha Asembleia Jerál Traballu MOKATIL ne’e, nia parte sei esforsu hodi membru komité baze MOKATIL atu serbisu maka’as hodi hasa’e produsaun rai-laran.

“Ami sei halo produsaun ne’ebé di’ak liu iha produsaun multi-setor hodi tau iha sentru kooperativa ne’ebé ami planeia hodi estabelese iha munisípiu sira. No ami promete sei halo produsaun oinoin, liuhosi mákina prosesamentu Sorghum nian ne’ebé maka oras ne’e ami haruka ona ba munisípiu sira hamutuk unidade 152”, nia subliña.

Presu ba Sorghum hetan aprovasaun ho votu husi partisipante maioria membru MOKATIL husi munisípiu 12 inklui RAEOA hamutuk 1.230 no asina husi Prezidente MOKATIL husi rejiaun hotu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here