DILI, 28 fevereiru 2020 (TATOLI)—Veteranu Afonso da Costa Rangel alias “Tatamou” hakotu iis iha Ospitál Nasionál Guido Valadares (HNGV-sigla portugés) iha sesta (28/2/2020) iha tuku 03:000 madrugada tanba sofre moras infesaun ne’ebé afetadu husi opresaun membru militár Indonézia sira, estómagu no raan midar.

Saudozeu nia alin mane, Joáo da Costa Rangel haktuir, moras ne’ebé saudozu sofre ne’e dezde uluk kedas ba hala’o ona tratamentu iha Ospitál Singapura (outubru 2019). Iha momentu ne’eba, matebian fila mai Timor-Leste maibé kontinua moras nafatin to’o ohin hakotu iis.

“Altura ne’eba, doutór sira dehan halo operasaun ba nia moras tanba moras komplikadu tebes. Maibé, matebian lakohi atu halo operasaun entaun ami família lori fila mai Timor-Leste,” dehan Saudozu tatamou nia alin, João da Costa Rangel, ba Ajénsia TATOLI iha saudozu nia rezideénsia, Cacaulidun, Dili, sesta (28/2/2020).

Nia haktuir, bainhira Governu Salazar autoriza atu tioroan sira harii partidu polítiku iha 1974, Saudozu Tatamou mós hanesan ema primeiru kuadru polítiku iha Partidu Frente Revolucionária de Timor-Leste Independente (FRETILIN) nia laran.

Iha 1975, nia dehan, Saudozu Tatamou halai sa’e ba foho no reziste iha ai-laran. Saudozu fila husi ai-laran iha 1979 no iha nia moris tomak bapak kaptura Saudozu Tatamou no tama komarka no sai hosi komarka iha 1997.

Iha 2001, Saudozu Tatamou hanorin iha Eskola Ensinu Bázika Katólika ida iha Ailok-Laran no saudozu reforma ona durante tinan hitu.

Saudozu Tatamou, João Rangel hateten, nu’udar funu na’in Forças Armadas de Libertação Nacional de Timor-Leste (FALINTIL) duranta tinan 24 nia laran.

Saudozu Tatamou mate husik hela nia oan na’in haat. Daudaun ne’e Saudozu Tatamou ba hamutuk ona ho nia feen-kaben Maria de Fátima Araújo no nia oan na’in tolu iha lalehan. Adeus, Veteranu Tatamou!

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here