Logo ministeriu saude

DILI, 28 fevereiru 2020 (TATOLI)-Diretór Jerál Servisu Kooperasaun Ministériu Saúde, Vitór Soares Martins, informa dadaun ne’e nia parte identifika ona fatin izolamentu ba pasiente coronavirus iha Postu Administrativu Metinaro, Munisípiu Dili.

“Ami haree ona fatin iha Metinaro atu nune’e dook hosi komunidade sira no prepara fatin izolamentu karik iha kazu,”dehan, Vitór Soares Martins hodi responde preokupasaun Xefe Suku Gricenfor, Francisca Sãozinha Brites Boavida ho ninia komunidade ne’ebe rezeita planu MS estabelese fatin isolamentu ba pasiente coronavirus iha Sentru Saúde Bairo Formosa Dili.

Nia rekoñese katak foinlalais Autoridade Lokál Gricenfor  ho ninia populasaun konsege haruka karta ida ba Vise Ministra Kuidadu Saúde Primaria hodi husu atu labele estabelese fatin isolamentu ba pasiente coronavirus tanba distánsia hela besik komunidade.

“Ami mós esplika ba autoridade lokál katak fatin ne’e la uza ba  pasiente coronavirus maibé ami ba peskiza de’it,”nia hateten.

Xefe Suku Gricenfor, Francisca Sãozinha Brites Boavida, hateten preokupa ho MS atu estabelese fatin isolamentu iha sentru saúde formosa.

”Ami suku Gricenfor halo kedas karta hodi dirije ba Ministériu Saúde, Diretora Saúde husi Munisípiu Dili, Xefi Sentru Saúde formosa, Prezidente Autoridade Munisípiu Dili, katak asuntu n’ee komunidade formoza rezeita ba fatin ba moras corona nian,”katak Nia.

Nia parte konsege simu karta resposta hosi Ministériu Saúde katak fatin ne’e la’os atu estabelese ba pasiente coronavirus sira.

”Depois ami hetan duni karta ida husi Ministériu Saúde nian katak fatin ida ne’e prepara provizoriamente seidauk iha kazu coronavirus  maibé ha’u esplika katak mezmu ke atu prepara mós ami sei la aseita tanba moras virus corona ne’e mundu tomak hatene katak moras ida ne’e hamate ema ho minutu de’it,”nia haktuir.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here