Ministru Agrikultura no Peska, Joaquim José Gusmão dos Reis Martins. Imajen/Egas Cristovão.

DILI, 28 fevereiru 2020 (TATOLI) – Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão, konvida Ministru Agrikultura no Peska, Joaquim José Gusmão Dos Reis Martins, atu aprezenta polítika kontrolu riku-soin tasi, liuliu peska hafoin Timor-Leste hetan ona demarkasaun fronteira marítima ho Austrália, iha Fórum Rejionál Asosiasaun Nasaun Sudeste Aziátiku (ASEAN-sigla inglés).

“Ohin, Maun Boot Xanana Gusmão konvida Ministériu Agrikultura no Peska (MAP) atu aprezenta esperénsia no polítika Governu nian ba situasaun no kontrolu peska iha tasi-laran, liuliu potensiál ka rikusoin ne’ebé iha tasi hanesan ikan no seluk tan, hafoin ita manan fronteira marítima husi Austrália”, informa Ministru Joaquim, hafoin halo aprezentasaun iha edifísiu Ministériu Finansa, Aitarak-Laran, sesta ne’e.

Governante ne’e argumenta, nia aprezenta mós nasaun membru Fórum Rejionál ASEAN (ARF-sigla inglés), kona-ba polítika Governu atu halo negosiasaun ho nasaun viziñu sira hodi define liña trilaterál iha tasi atubele fásil kontrola peska ilegál sira iha Tasi Timór.

“Ita hetan ona median line, maibé ita nafatin halo negosiasaun ho nasaun viziñu sira hanesan Austrália no Indonézia, atu ba faze liña trilaterál nian”, nia akresenta.

Ho nune’e, Ministru Joaquim husu atu rezolve lalais liña trilaterál permanente atu Governu Timor-Leste bele fó mós lisensa ba empreza sira ne’ebé hakarak halo investimentu iha área peska liuliu kaer ikan iha tasi-laran.

Nia realsa, biban ne’e aprezenta mós problema Timor-Leste nia atu haree ba peska ilegál tanba seidauk iha liña trilaterál permantente entre Austrália no Indonézia, tanba ne’e presiza mós estabelese Autoridade Marítima.

“Ita mós iha hanoin no politika ona atu estabelese lalais ita nia Autoridade Marítima, kompleta ho ekipamentu liuliu ró sira atubele kombate peska ilegál iha tasi-laran”, nia adianta.

Governante ne’e realsa, dadaun ne’e empreza boot lima mak hahú hatudu interese atu ka’er ikan iha Tasi Timór, maibé Governu sei haree uluk lai ninia ekipamentu, kapasidade no ró molok fó lisensa.

Ministru refere liután, Governu fó ona kriteria ba kompañia sira atu bainhira fó lisensa ba tenke harii mós fábrika prosesamentu ikan iha rai-maran.

“Kuandu ita fó lisensa no husik de’it empreza lori ba, ne’e ita kontrola labele. Tanba ne’e ita husu bainhira  fó lisensa, empreza sira tenki halo fabrika iha Timor-Leste”, nia argumenta.

Empreza lima ne’ebé aprezenta ona interese, mai husi nasaun Xina, Singapura no Austrália.

Semináriu ne’e, iha fórum espesífiku ida ba Estadu sira hodi diskute rezolusaun disputa liga ho direitu tasi nian iha rejiaun no sei foti ezemplu husi esperénsia rejionál sira, no mós husi péritu no akadémiku sira, hodi ezamina kazu anteriór sira, liuliu Timor-Leste no Austrália nia prosesu konsiliasaun bainhira estabelese fronteira marítima permanente liuhosi Komisaun Konsiliasaun United Nations Convention for the Law of the Sea (UNCLOS).

Timor-Leste no Austrália mak hanesan nasaun dahuluk ne’ebé uza Komisaun Konsiliasaun hodi estabelese sira nia fronteira marítima.

Tratadu Fronteira Marítima ne’ebe asina ona iha 30 agostu 2018 mak hanesan pasu importante ba nasaun-rua nia relasaun bilaterál no direitu internasionál.

Fórum ne’e hanesan konsultativu rejionál ida, kompostu husi país partisipante hamutuk 27, ne’ebé mak buka atu fahe hanoin kona-ba asuntu seguransa iha rejiaun Ázia-Pasífiku.

Timor-Leste hetan konvite hodi hola parte iha Fórum ne’e hahú iha tinan-2005, no sai hanesan nasaun partisipante ne’ebé ativu no uma-na’in ba fórum antes ne’e iha 2011, 2017 no 2019.

Esperiénsia hirak ne’e haforsa Timor-Leste nia prosesu aplikasaun adezaun ba ASEAN, liu-hosi ninia kapasidade hodi partisipa no organiza eventu ASEAN.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here