Komandante Polisia Munisípiu Dili, Superintendente Xefe Armando Monteiro. Imajen/Eugénio Pereira

DILI, 28 fevereiru 2020 (TATOLI)- Konfrontu entre grupu juventude ho grupu Organizasaun Arte Marsiál balun ne’ebé akontese iha área Hera, kinta (27/02/2020), tuku 11:00 dadeer,  rezulta motór rua no mini ofisina ida hetan estragu totál.

Hafoin akontesimentu, Komandu Polisia Nasionál Munisípiu Dili Eskuadra Dom Aleixo, Na’in Feto, Vera Krús no ekipa Servisu Informasaun Polisia (SIP)  no membru FALINTIL-Forsa Defeza Timor-Leste (F-FDTL) kaptura kedas suspeitu na’in sia (9) ne’ebé deskonfia envolve iha konfrontasaun.

Komandante Polisia Munisípiu Dili, Superintendente Xefe, Armando Monteiro  dehan, suspeitu na’in sia ne’e PNTL halo investigasaun membru na’in tolu (3) husik livre tanba menoridade no kontinua investiga suspeitu na’in neen (6) ho inisiál, TFG, FDS, ADS, CSP, MVN ho MM.

Kronolojia kazu ne’e akontese, hafoin membru grupu organizasaun arte marsiál balun ne’ebé uza atributu organizasaun fila hosi serimónia funerál ba sira nia membru ida iha ne’ebé hetan asidente tráfegu ba hakoi iha Munisípiu Viqueque fila fali mosu problema iha área Hera nian.

“Konfrontu ne’e akontese hafoin membru sia ne’e fila hosi Viqueque mai maka hamosu fali problema hodi estrada komunidade sira nia mini ofisina ida no estraga motór rua, no ita konsege kaptura suspeitu sira,” dehan Armando Monteiro ba jornalista, ohin, iha Komandu PNTL, Caicoli, Dili.

Suspeitu na’in neen agora daudaun submete hela ba prosesu investigasaun molok aprezenta ba Ministériu Públiku hodi prosesa suspeitu sira tuir lei.

Daudaun ne’e parte polisia kontinua koloka membru na’in 15 ho apoiu Ofisiál Polisia Suku (OPS) no membru Konsellu Polisiamentu Komunitáriu (KPK) hodi halo seguransa másimu iha fatin akontesimentu.

Iha parte seluk, Komandante Armando dehan, parte polisia hodi kalan oras tuku 11:00 mós konsege akalma konfrontu tuda malu entre grupu juventude sira iha área Igreja Balidi besik malu ho Estasaun Kombustivel Esperansa Timoroan (ETO).

Eletrisidade Soke Mate Joven Ida

Oportunidade ne’e, Superintendente Xefe, Armando Monteiro, informa mós katak, iha kinta (28/02/2020), k mosu inséndiu sirkuitu eletrisidade hodi soke mate joven ida ho inisiál JG bainhira hala’o hela atividade solda odamatan uma iha área Hera.

Polisia mós evakua kedas mate isin ba Ospitál Nasionál Guido Valadares (HNGV) hodi halo autópsia no ohin dadeer entrega ona ba família hodi hala’o serimónia funerál iha Ossu, Viqueque.

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here