Koordenadór Jerál Komisaun Organizadora Komemorasaun Tinan 20 Konsulta Populár, Virgílio Smith. Imajen/Tatoli

DILI, 28 fevereiru 2020 (TATOLI)—Prezidente Komisaun Organizadora atuál Prezidente Komisaun Omenájen, Virgílio Smith hateten, bandeira tolu (3) inklui sei hasa’e iha selebrasaun loron nasionál veteranu ne’ebé monu iha 3 marsu.

Nia hatutan, bandeira tolu ne’ebé sei hasa’e iha loron nasionál veteranu ne’e mak hanesan Frente Revolusionária Timor-Leste Independente (FRETILIN), Forsa Armada Libertasaun Nasionál Timor-Leste (FALINTIL) no Bandeira Conselho Nacional Resistensia Timorense (CNRT).

“Serimónia hasa’e Bandeira iha parte rua. Parte ida dahuluk sei hasa’e bandeira tolu hanesan bandeira FRETILIN, FALINTIL no Bandeira CNRT. Agora, tansá mak bandeira Conselho Nacional da Rezisténsia Timorense (CNRT). CNRT ida-ne’ebé mak hakotu ita-nia funu ba ukun rasik aan no hakotu ita-nia funu ba libertasaun nasionál,” Prezidente Komisaun Organizadora, Virgílio Smith, informa ba jornalista sira hafoin aprezenta programa selebrasaun loron nasionál 3 marsu ba Prezidente Parlamentu Nasionál, Arão Noé de Jesus da Costa Amaral, iha Parlamentu Nasionál, sesta ne’e.

Nia argumenta, Bandeira tolu (3) ne’e hasa’e ho razaun tanba sai ona memória hahú hosi prosesu funu to’o 1999 no Bandeira tolu tolu ne’e marka istória iha prosesu funu no povu tomak hatene.

Nia dehan, selebrasaun ne’e momentu ida atu marka pasu foun ida hafoin hala’o tiha kongresu dahuluk hodi estabelese Konsellu Kombatente Libertasaun Nasionál nian.

Prezidente Komisaun Organizadora ne’e hateten, iha tinan 2021, selebrasaun ne’e sei dirije hosi Konsellu Kombatente Libertasaun Nasionál maibé governu liuhosi ministériu relevante apoia nafatin.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here