Sekretáriu Estadu Kooperativa, Arsenio Pereira da Silva. Imajen TATOLI/Egas Cristovão

DILI, 28 fevereiru 2020 (TATOLI) – Sekretáriu Estadu Kooperativa, Arsenio Pereira da Silva, hateten Asembleia Jerál Traballu Movimentu Kamponez Timor-Leste (MOKATIL) iha tinan ida ne’e, foka liu ba asuntu importante rua mak hanesan halo produsaun ba Sorghum ka Batar Kay Rala no define presu loloos bainhira atu fa’an iha merkadu.

”Asembleia tinan ne’e, membru sira sei deskute kona-ba oinsá halo produsaun ho kualidade ba Batar Kay Rala rasik no define loloos presu, nune’e karik bainhira halo produsaun hodi lori ba merkadu, iha ona ninia presu definitiva. Tanba ne’e ohin Sekretaria Estadu Kooperativa (Sekoop) mai hamutuk ho sira atu deskute kona-ba asuntu ne’e”, dehan Arsenio ba Agência TATOLI, hafoin partisipa Asembleia Jerál Traballu MOKATIL iha Sentru Konvensaun Dili (CCD-sigla portugés), sesta ne’e.

Nia realsa, kona-ba kestaun produsaun Batar Kay Rala, MOKATIL rasik promete bainhira halo lansamentu nasionál iha suku Guiço, Liquiçá, katak prontu halo produsaun barak ba batar ne’e hodi kontribui ba ekonomia rai-laran.

“Sira promete ona katak sei halo produsaun barak ba Batar Kay Rala rasik no iha ha’u nia mandatu hanesan Sekretáriu Estadu Kooperativa tinan ne’e, sei kontinua koopera ho MOKATIL atu fornese alimentasaun eskolár liuliu haforsa merenda eskolár”, nia akresenta.

Arsenio salienta, daudaun ne’e besik ona ektare 2.000 Batar Kay Rala ne’ebé kuda iha territóriu laran tomak. Tanba ne’e, Asembleia Traballu Nasionál hamutuk ho Sekoop inklui MOKATIL atu deside ninian presu iha merkadu, hafoin merkadu fornese ba alimentasaun eskolár ne’e maizumenus hanesan matéria prima ka hanesan produtu finál.

Governante ne’e dehan, agora daudaun SEKoop fasilita MOKATIL liuhosi treinamentu no fó apoiu ona mákina pos-kolleita, atu kuda Batar Kay Rala ne’e tuir mai halo prosesa hodi bele sai produtu finál.

Iha Asembleia Jerál ne’e mós SEKoop kolabora ho MOKATIL hodi haree maneira prosesamentu Batar Kay Rala rasik, nune’e bele iha valór nutritivu kuandu ema konsumu.

“Ha’u sempre hateten ba MOKATIL katak folin ne’e mós tenki razoável. Tanba ne’e, ami sai hanesan parseiru permanente durante ha’u ninia mandatu atu haree mós ba iha produsaun.”, nia akresenta.

Nune’e, governante ne’e garante katak tinan ne’e MOKATIL bele halo ona produsaun tuir planu.

“Iha 2019 ne’e, sira foka ba iha fini Sorghum, ne’ebé iha tinan ida bele kolleita dala-tolu no fini ne’e rasik sufiesiente ona atu halo produsaun iha tinan ida-ne’e. Tinan ne’e MOKATIL sei halo produsaun ba Batar Kay Rala tanba mákina prosasmentu ne’ebé SEKoop apoiu ba sira  hamutuk 152, ne’e sufisiente ona atu halo produsaun”, nia subliña.

Parte seluk, Prezidente MOKATIL Hélio Dias da Silva, reforsa iha Asembleia MOKATIL, otimista sei halo produsaun hodi bele priense demanda merkadu.

“Ita iha ona makina produsaun Batar Kay Rala ne’ebé ho unidade 152 no agora ami komesa haruka ona ba munisípiu sira, nune’e ami hahú haree ba produsaun. Enkuantu seluk tan maka define presu”, dehan Hélio.

Nia hatutan, iha tinan ida-ne’e MOKATIL prontu halo produsaun Batar Kay Rala tanba produsaun fini ne’ebé maka sira prodús ona iha tinan kotuk hamutuk ektare 2327.  Husi ne’e iha ona tonelada 12.

Hélio refere, kona-ba konferénsia dahuluk ne’e  sei iha aprezentasaun husi Sekretáriu Estadu Arsenio no péritu husi Indonézia.

Enkuantu aban (29/02) sei kontinua aprezentasaun relatóriu ba progresu servisu MOKATIL durante ne’e, hafoin kontinua ba diskusaun kona-ba presu Sorghum no modelu produsaun.

Ikus mak liuhosi Asembleia Jerál ne’e maka MOKATL hamutuk ba SEKoop atu halo rezolusaun atu fó mandatu ba membru MOKATIL ida-idak kona-ba saida maka bele halo iha tinan-2020.

Asembleia ne’e, realiza durante loron-rua no sei ramata iha sábadu ne’e.

Abertura Asembleia Jerál ne’e husi Sekretáriu Estadu Arsenio Pereira da Silva no partisipa husi péritu kamponeza husi Indonézia, Antonio Ai-Tahan Matak, entidade sira seluk inklui membru kamponeza ne’ebé mai husi munisípiu no postu iha territóriu Timor-Leste.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here