Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 27 fevereiru 2020 (TATOLI) – Ministru Negósiu Estranjeiru no Kooperasaun, Dionísio da Costa Babo Soares, observa sirkulasaun Coronavirus ne’ebé mosu dahuluk iha Sidade Wuhan, Xina, daudaun ne’e hahú mosu iha Koreia Súl no kuaze afetadu ba ema na’in-900, tanba ne’e Governu Timor-Leste preokupa ho traballadór timoroan ne’ebé serbisu iha nasaun ne’e maibé nafatin fó fiar ba sistema saúde.

Ministru ko’alia asuntu ne’e, relasiona ho Sidade Daegu iha Koreia Súl, hanesan sidade ne’ebé hetan uluk alastru Coronavirus, enkuantu sidadaun balun hahú izola-an iha uma no traballadór timoroan na’in-17 mak serbisu iha sidade ne’e.

Tuir governante ne’e, Embaxadór Timor-Leste iha Koreia súl hamutuk ho adidu traballadór halo kontaktu ona trabaladór timoroan kuaze 3000-resin iha Koreia Súl atu kuidadu-an no kontinua akompaña dezenvolvimentu Coronavirus.

“Ita fiar Governu Koreia nia sistema saúde di’ak tebes atu fó protesaun ba timoroan sira, liuliu  na’in-17 iha sidade Daegu. Tanba ne’e, ita la ansi halo medida nesesária tanba ita konfia katak buat hotu sei la’o ho di’ak”, tenik Ministru Dionísio iha Palásiu Governu, kinta ne’e.

Nia realsa, traballadór timoroan barak liu mak iha Koreia Súl no balun serbisu hela iha eskema ne’ebé bele kontrola liuhosi Sekretaria Estadu Formasaun Profisionál no Empregu (SEFOPE), hamutuk ho Governu Korreia, maibé daudaun ne’e maluk balun sai ona husi eskema no ba fali serbisu ketak.

“Maski MNEK fiar ho sistema saúde Koreia Súl, maibé tauk oituan tanba dezenvolvimentu alastru Coronavirus ne’e afetadu ona ba ema kuaze 900-resin iha Koreia Súl no sai númeru afetadu boot liu iha nasaun liur Xina nia. Fora husi Xina ne’e, númeru afetadu boot tebes mak iha Koreia ne’ebé ita tauk tanba timoroan barak serbisu iha ne’ebá maibé to’o agora timoroan hotu sei di’ak hela,” nia akresenta.

Sidade Daegu hanesan Provínsia ba tratamentu espesiál Coronavirus (especial management zona), ne’ebé timoroan na’in-17 sei di’ak hotu.

“Agora traballadór timoroan ne’ebé serbisu iha ne’ebá, kompañia sira fó protesaun ba sira no sira kontinua serbisu nafatin”, nia subliña.

Jornalista: Florencio Miranda Ximenes

Editora: Julia Chatarina

INFORMASAUN

HAKEREK NO HATÁN

Please enter your comment!
Please enter your name here