Arsebispu Arkedioseze Metropolitana Dili, Don Virgílio do Carmo da Silva, SDB. Imajen Tatoli/ Egas Cristóvão

DILI, 26 fevereiru 2020 (TATOLI)–Arsebispu Metropolitana Arkedioseze Dili, Dom Virgílio do Carmo da Silva, SDB, haklaken lia-tatoli prinsipál ba sarani sira katak liuhosi dalan tolu hanesan orasaun, karidade no jejún nu’udár investimentu boot liu ne’ebé dura ba moris rohan laek (Evanjellu Mateus; 6:1-6.16-18).

“Orasaun, karidade no jejún mak investimentu ba tezouru boot ida ne’ebé dura ba nafatin, dura ba moris rohan laek. Basaa, Jezús rasik dehan estiver-se o tesouro estará também o seu coração,” dehan Arsebispu Metropolitana Arkedioseze Dili, Dom Virgílio do Carmo da Silva, SDB, hato’o lia-tatoli liuhosi omilía iha misa Kuarta Sinzas nian ne’ebé hala’o iha Igreja Katedral Nossa Senhora Imaculada da Conceição, Vila Verde, Dili, ohin.

Bibi atan ne’e esplika, Evanjellu aprezenta dalan tolu esensiál atu iha Kuarezma ne’e, nu’udár sarani, ida-idak bele buka atu kumpre ho neon no laran, lahó ipokrazia katak halo tanba atu ema haree maibé halo tanba nesesidade.

Sarani Katolika sira wainhira partisipa iha misa Kuarta Feira Xinzas iha Igreja Maria Auxiliadora Komoro, 26 Febreiru 2020.Imajen/Antonio Goncalves

“Dalan tolu ne’e, lori ema atu hatene loloos kona-ba realidade moris nian. Tanba, orasaun liga ita ho Nai Maromak. Karidade liga ita ho ita-nia belun sira no jejún liga ita ho ita-nia aan rasik. Nee duni, buat tolu ne’e serve liu tan ba ha’u, atu bele hadomi liután Maromak, hadomi maun-alin no hadomi aan ita-nia rasik,” arsebispu ne’e subliña.

Arsebispu ne’e hatutan, Kuarezma hanorin ema atu hateke ba leten aas hodi hanoin kona-ba Nai Maromak ho orasaun. Nune’e, tuir nia, ita bele liberta aan husi hanoin buat ne’ebé rai ninian, ne’ebé dala barak ema preokupa liu, dala barak ema laiha tempu ba Maromak, tanba hanoin de’it kona-ba buat ne’ebé rai ninian.

Amu bispu esplika, kuarezma mós hanorin ema hatene hateke ba ema seluk liuhosi karidade tanba karidade mak halo ema la hanoin aan de’it maibé hanoin kona-ba ema seluk.

Ikus liu, nai lulik ne’e hateten, kuarezma konvida ema nu’udár sarani atu hateke liu ba laran, hateke ba ema ida-idak nia moris, tanba dalaruma ema fasil hateke ba leten no ba ema seluk.

“Valor ne’ebé mak ita presiza fó atensaun husi Kuarezma, ha’u-nia konsentrasaun ba krusfiksu. Katak, Jezús ne’ebé iha Krúz mak dalan ba moris. Basaa, Nia [Maromak] mak orienta ha’u, orienta ita ida-idak ba dalan Maromak ninian no dalan lalehan ninian,” amu bispu ne’e esplika.

Jezús ne’ebé maté iha Krús leten, nia dehan, hatudu mai ita vida ida simples liu, la presiza halibur buat oin-oin atu bele kontente. Tanba, nia haktuir, iha Kruz, Jezús hanorin ita atu presiza iha duni korajen atu hatene halo renunsia hodi mate ba ita-nia aan, hakribit buat ne’ebé ita hatene katak la di’ak no hatene husik buat hirak ne’ebé la nesesáriu iha moris.

“Bainhira ita preokupa ho buat oin-oin, la permite ita atu la’o ba oin tanba naha todan resin,” bibi atan ne’e hateten.

Tanba, Arsebispu ne’e hateten, Jezús ne’ebé iha Krúz leten, konvida ema atu moris tuir Nia dalan. Nune’e, ema la lakon de’it iha ahu-kdesan sira rai ne’e ninian maibé moris ida ne’ebé ahi karidade ninian tenke lakan duni, la maté tanba ema ninia mediokaridade, superfisialidade, laiha esforsu atu sai husi buat ne’ebé isin ninian.

Bibi atan ne’e rekoñese katak, los duni, la’ós mós fasil hanesan buat ne’ebé Nai Jezús husu maibé bele orienta ema nia moris ba meta ida ne’e.

“Ida ne’e mak Nia hatudu mai ita iha Kuarezma ida ne’e, hahú ho ahu-kdesan ne’ebé ita simu ohin no lori ita ba to’o iha naroman boot Páskua ninian no lori ita atu deskobre katak iha rate, Jezús la nakfilak ba ahu-kdesan. Maibé, Nia moris fila fali, nune’e mós iha ita-nia loron Kuarezma no Kuarta Feira Sinzas ne’e, ita mós rekoñese ita-nia aan hanesan ahu-kdesan, hanesan rai-rahun,” Nai bispu hateten.

Amu bispu esplika, se sarani sira hakaas aan ho haraik aan fila ba Maromak ho sarani ida-idak ninia frakeza, frajilidade no mizéria, mak sarani sira bele fila fali ba dalan domin nian.

Partisipa iha misa kuarta feira sinzas, ohin, Prezidente Repúblika Francisco Guterres “Lu Olo” ho nia espoza, relijiozu-relizioja sira no sarani ua’in ba ua’in.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here