Atividade hatuun no hasa'e kontentor ba ró iha Portu Dili. Imajen/espesiál

DILI, 25 fevereiru 2020 (TATOLI) – Diretór Nasionál Operasaun Autoridade Aduáneira (AA/Alfándega), Júlio José Ximenes, informa daudaun ne’e AA servisu hamutuk ekipa liña ministeriál atu asegura sasan merkadoria  hanesan nesesidade báziku no infraestutura hodi prevene Coronavirus afeta mai Timor-Leste.

Dirijente ne’e realsa, AA kolabora ho ekipa liña ministeriál hanesan Ministériu Saúde, Organizasaun Saúde Mundiál (OMS), Diresaun Nasionál Servisu Migrasaun, Ministériu Agrikultura no Peska liuhosi Diresaun Nasionál Kuarentena no Bio-Seguransa hodi halo kontrolu másimu iha postu integradu iha Timor-Leste.

“Sasan merkadoria ne’ebé tama ita-nia rai seidauk iha afetadu ba Coronavirus”, tenik Diretór Operasaun ne’e iha Portu Dili, tersa ne’e.

Ekipa traballu ne’e halo ona vijánsia no observasaun ba merkadoria ne’ebé movimenta iha Portu Dili, Aeroportu no Fronteira Terestre.

Koordenasaun serbisu ekipa ne’e, ida-idak hahú implementa knaar tuir lei haruka hodi asegura kontrolu másimu ba vizitante inklui sasán importasaun no esportasaun liuhosi Aeroportu Prezidente Nicolau Lobato Dili, Fronteira Batugadé, Mota Masin-Covalima no Postu Oésilo, Oé-Cusse no Portu Dili la’o di’ak tebes.

“Ita halo koordenasaun servisu ho liña ministeriál di’ak tebes. Ida-idak hala’o nia knaar no Ministériu Saúde maka pasa revista maka’as ba  pasajeiru atu prevene Coronavirus ne’ebé perigu tebes ba ema nia vida”, nia dehan tan.

Nune’e mós, AA halo pasa revista ba sasán nesesidade báziku no infraestrutura ne’ebé haruka mai Timor-Leste, tenke la’o tuir regra no rekizitu.

Ho nune’e, durante halo koordenasaun servisu to’o agora ekipa seidauk rejista ema ruma maka sofre sintoma Coronavirus.

Antes ne’e, Diretór Jerál AA, José António Fátima  Abílio, dehan maski Timor-Leste hasoru hela impase polítika, maibé servisu Alfándega haree ba gráfika, importasaun sasán nesesidade báziku no sasán infraestrutura husi rai li’ur mai Timor-Leste sei kontinua la’o normál.

Iha tinan 2019 liubá, Alfándega konsege hatama  osan hamutuk millaun $68 ba kofre Estadu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here