Prezidente Repúblika, Francisco Guterres Lú Olo. Imajen Tatoli/António Gonçalves

DILI, 24 fevereiru 2020 (TATOLI)–Prezidente Repúblika (PR), Francisco “Lú Olo” Guterres, husu ba partidu sira ne’ebé forma ona koligasaun foun ho Partidu Congresso Nacional  de Reconstrução de Timor (CNRT), atu hanoin didi’ak bainhira hakarak atu aprezenta fali kandidatu membru Oitavu Governu na’in-sia ne’ebé uluk la simu pose.

“Ida-ne’e, ema hotu hatene ona katak Prezidente Repúblika horibainhira la fó pose. Ikusmai, tanba de’it dehan katak ema na’in-sia, vota kontra Orsamentu Jerál Estadu (OJE) 2020, orsamentu ida ba povu tomak, halo Governu no Primeiru-Ministru, Taur Matan Ruak hanesan ne’e hela. Tanba ne’e, atu aprezenta filafali lista ema na’in-sia ninian, CNRT ka partidu sira-ne’e, hanoin halo didi’ak! Hanoin halo didi’ak! Ha’u repete tan, hanoin halo didi’ak maka aprezenta!,” Xefe Estadu Lú Olo hato’o apelu ne’e hafoin halo abertura ba Konferénsia Nasionál Komisaun Anti Korrupsaun (KAK), iha salaun Ministériu Finansa, Aitarak Laran, Dili, ohin.

To’o oras ne’e, Prezidente Repúblika rasik seidauk simu karta ruma husi koligasaun foun ne’ebé forma ona husi Partidu CNRT no partidu lima seluk tan.

“Ha’u seidauk simu karta husi koligasaun foun ne’ebé maka dehan katak forma ona entre partidu polítiku sira ho CNRT,” PR Lú Olo informa.

Antes ne’e, Prezidente Repúblika deklara katak sei fó apoiu ba kualkér koligasaun foun atu forma Governu foun hodi ultrapasa impase polítika rai-laran.

Entretantu, iha sábadu 22 fevereiru 2020, partidu neen (6) asina ona akta koligasaun ne’ebé reprezenta husi Prezidente CNRT, Kay Rala Xanana Gusmão, Prezidente PD, Mariano “Assanami” Sabino, Prezidente KHUNTO, Armanda Berta dos Santos, Prezidente En-ezersísiu UDT, Rodolfo Aprarício Guterres, Prezidente Interinu FM, Egídio de Jesus no Prezidente PUDD, António de Sá Benevides.

Jornalista : Cipriano Colo

Editór       : Cancio Ximenes

4 KOMENTÁRIU

  1. Husu PR hatudu evedencia husi Membro Governo nain 9 ne’ebe, PR lakohi fo pose ne’e komete duni krime ka lae??? iha ona Buletin Registo Kriminal (BRC) ba ema nain 9 ne’e kalae ou iha ona desizaun husi Tribunal no iha ona Tranzitu julgadu ka lae????.
    artigu 69 konstituisaun RDTL, koalia konaba separasaun poder, maibe PR uza nia kargu hodi julga fali ema hanesan Juiz ida.

  2. Prezunsaun ba inosensia sei metin nafatin ba ema ida nebe ita deskonfia komete krime ruma. Kuandu tribunal hanesan orgaun judiciariu ida ninia desizaun dehan katak ema ne la sala no labele kondena nia, tanba iha kodigo penal iha artigo 1 nebe hakerek konaba prinsipiu legalidade. Ne duni husu PR atu labele julga ou kondena ema ida hodi halo fall intervensaun politika ba iha orgaun judiciariu ninia desizaun.

HAKEREK NO HATÁN

Please enter your comment!
Please enter your name here