Embaixadór naun rezidénte Ukraina mai Timor Leste (TL), Alexandre Nechytaylo, entrega karta kredensiál ba Prezidente Repúblika (PR), Francisco Guterres Lu Olo, iha Salaun Xina Palásiu Prezidensiál Bairrupité, Dili. Imajen/Média PR

DILI, 21 fevereiru 2020 (TATOLI) – Embaixadór naun rezidente Ukránia  mai Timor-Leste, Alexander Nechytaylo, kinta loro-kraik (20/02/2020), iha Ministériu Justisa, Dili, hasoru malu ho Ministru Justisa (MJ), Manuel da Costa Cárceres, hodi partilla informasaun ba malu no fortalese amizade hodi hanoin oinsá parte rua bele iha kooperasaun iha setór justisa.

“Ha’u ba vizita komisaun rekonsiliasaun Indonézia-Timor-Leste no ha’u hetan dadus barak hakerek ho lian inglés. Ha’u espera katak Timor-Leste promove rekonsiliasaun iha futuru tanba bele ajuda nasaun hodi hetan progresu ba oin nafatin,” hateten Embaixadór  Alexander Nechytaylo ba jornalista, hafoin enkontru ho Ministru Justisa Manuel Cárceres.

Ministru Manuel Cárceres, aprofunda tan, enkontru ho Embaixadór Alexander Nechytayclo, hanesan primeiru enkontru atu koñese malu no hametin liu tan amizade, nune’e mós oinsá atu troka ideia ba malu atu bele iha kooperasaun iha setór justisa.

Ministru Manuel Cárceres mós partilla dezenvolvimentu setór justisa iha Timor-Leste ba diplomata Ukránia ne’e, liuliu lejizlasaun sira no reforma judisiáriu ne’ebé daudaun la’o hela.

“Ha’u informa ba nia kona-ba Timor-Leste iha Tribunal Distritál haat (4), maibé sidauk iha supremu tribunal justisa, iha de’it Tribunal Rekursu, ho nune’e iha oitavu governu ida ne’e liuhosi Ministériu Justisa prepara daudauk ona lei organizasaun judisiáriu para atu reforsa liu tan setór judisiáriu iha Timor-Leste,” hateten Ministru Manuel Cárceres.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here