DILI, 20 fevereiru 2020 (TATOLI)—Prezidente Repúblika, Francisco “Lú Olo” Guterres, ohin, iha Pálasiu Prezidente Nicolau Lobato Bairru-Pite, simu karta kredensiál hosi nasaun tolu mak nasaun Ukraina, Fransa no Turkia.

Hafoin akompaña embaixadór husi nasaun tolu ne’ebé entrega karta kredensiál ba Xefe Estadu Francisco “Lú Olo” Guterres, Sekretáriu Jerál Ministériu Negósiu Estranjeiru no Kooperasaun (MNEK), Jorge Trindade Neves de Camões informa, estadu Timor-Leste fortifika nafatin kooperasaun ho nasaun Fransa iha área kapasitasaun rekursu umanu.

“Ita haruka ita-nia ema balun ba Fransa tuir treinamentu, tuir formasaun oinsá sai ema ne’ebé tein di’ak (Chief). Ita iha mós kooperasaun iha área Institutu Peskiza Dezenvolvimentu Fransa ninian. Ita esplora hela ho ita-nia Sekretária Estadu Arte Kultura (SEAK), oinsá atu bele esplora posibilidade kooperasaun iha área kulturál ninian. Diskusaun sei la’o hela. Ita espera iha tempu oin bele esplora di’ak liután no haree fortifika liután kooperasaun hirak ne’e,” dehan Jorge Trindade Neves de Camões ba jornalista sira iha Pálasiu Prezidénsial, Bairru-Pite, ohin.

Aleinde halo kooperasaun liuhusi kapasitasaun rekursu umanu, nia hatutan, durante ne’e Timor-Leste nia kooperasaun ho Fransa la’o hela liuhosi kooperasaun bilaterál mak hanesan kompañia Fransa nian iha Timor hodi hala’o hela konstrusaun iha Portu Tibar.

Durante diskusaun bilaterál, nia haktuir, Prezidente Repúblika husu ba embaixadór sira, atu hato’o ba ida-idak ninia Xefe Estadu, Timor-Leste ninia agradesimentu tanba Xefe Estadu sira haruka ona sira-nia embaixadór iha Jakarta akredita mai Timor-Leste.

“Embaixadór Fransa mai Timor-Leste ho naran Oliver Chambard. Oras ne’e, nia hela iha Jakarta-Indonézia mak akredita mai Timor-Leste,” nia dehan.

Tuir ajenda, nia informa, iha parte lorokraik sei iha tan aprezentasaun karta kredensiál husi Embaixadór sira mai husi Eziptu, Bulgaria, ho Suisa no balu Sei halo tan iha aban (sesta, 21/02/2020).

Ukraina Komprometidu

Entretantu, nia haktuir, nasaun Ukraina komprometidu atu serbisu hamutuk oinsa bele reforsa kooperasaun bilaterál ho Timor Leste iha área kapasitasaun rekursu umanu liuhosi formasaun enjeñaria Infromasaun no Teknolojia (IT) iha universidade ida ne’ebé potensiál tebes iha sira-nia rain.

Embaixadór naun Rezidénte Ukraina mai Timor Leste (TL), Alexandre Nechytaylo, entrega karta kredensiál ba Prezidente Repúblika (PR), Francisco Guterres Lu Olo, iha Salaun Xina Palásiu Prezidensiál Bairrupité, Dili.
Imajen Média PR

“Komitementu katak, husi Ukraina mós espresa ninia vontade atu oinsá bele tulun ita iha área kapasitasaun rekursu umanu tanba iha ne’eba mós sira iha universidade ne’ebé potensiál tebe-tebes iha formasaun enjeñaria Informasaun no Teknolojia (IT) ninian. Sira mós Sei haree posibilidade atu iha tempu oin mai, ita bele haruka ita-nia ema ba eskola iha ne’ebá. Maibé, ne’e iha faze diskusaun entre Timor-Leste ho Ukraina iha tempu oin,” nia hateten.

Nia hatutan, Timor-Leste seidauk iha kooperasaun barak ho Ukraina no seidauk iha kooperasaun konkreta maibé TL iha kompromisiu no determinasaun atu loke diskusaun oinsa hala’o kooperasaun ho Ukraina.

Nia informa, embaixadór Ukraina mai Timor-Leste, Alexandre Nechytaylo, oras ne’e daudaun hela iha Malázia.

Posibilidade Turkia Esplora Área Turizmu

Embaixadór naun Rezidénte Turkia mai Timor Leste, Mahmut Erol Kiliç, entrega karta kredensiál ba Prezidente Repúblika, Francisco Guterres Lu Olo, iha Salaun Xina Palásiu Prezidensiál Bairrupité, Dili.
Imajen Média PR

Iha fatin hanesan, embaixadór Naun Rezidénte Turkia mai Timor-Leste, Mahmut Erol Kiliç komprometidu atu serbisu hamutuk oinsá bele reforsa kooperasaun ho Timor-Leste no iha posibilidade atu esplora kooperasaun ho Timor-Leste (TL) iha área Turizmu.

“Turkia ita laiha kooperasaun barak no ita seidauk iha kooperasaun konkreta maibé ita iha kompromisiu no determinasaun, atu loke diskusaun oinsá hala’o kooperasaun iha futuru. Turkia ninian, ita sei haree posibilidade oinsá esplora posibilidade kooperasaun iha área turizmu no iha investimentu komérsiu ninian iha tempu oin,” nia hateten.

Sekretáriu Jerál MNEK ne’e mós hateten, embaixadór Turkia espresa hela ninia intensaun atu loke embaixada iha Timor-Leste iha loron aban.

Durante diskusaun bilaterál, nia hatutan, Prezidente Repúblika husu ba embaixadór Turkia, atu hato’o ba ninia Xefe Estadu, Timor Leste ninia agradesimentu, tanba Xefe estadu Turkia haruka ona nia embaixadór iha Jakarta akredita mai Timor-Leste.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here