Komandante Jeral F-FDTL, Major Jeneral Lere Anan Timur.Imajen/Antonio Goncalves

DILI, 19 fevereiru 2020 (TATOLI)–Xefe Estadu Maiór FALINTIL-Forsa Defeza Timor Leste (F-FDTL), Majór Jenerál Lere Anan Timur, preokupa ba seguransa iha liña fronteira terrestre, tan ne’e Timor-Leste tenke asegura hodi aumenta no reforsa husi membru F-FDTL husi Unidade Polísia Militár (PM) iha postu fronteira Tunubibi.

“Kona-ba seguransa ita preokupa ho liña fronteira, tanba ita-nia liña fronteira ne’e naruk no kondisaun mínimu tebes atubele kontrola. Ho ida-ne’e maka krime organizadu bele aproveita lakuna sira-ne’e, bele infiltra mai ita-nia rain,” dehan Lere Anan Timur hafoin hala’o enkontru semanál ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru-Pité, Dili, ohin.

Ezemplu, nia hatutan, iha informasaun dehan kilat tama duni Timor karik tanba fatór ida mak Timor-Leste nia seguransa iha fronteira terrestre ne’e fraku tebes.

“Iha fulan ida-ne’e, ha’u reforsa ona postu Tunubibi, Bobonaro, ho postu Tilomar Suai, tanba uluk ne’e kuaze ita koloka seksaun ida, no agora bele tau pelotaun ida liu atu prevene situasaun liuliu informasaun sira ne’ebé maka to’o,” Lere hateten.

Lere hatutan, importante maka sira ne’ebé halo seguransa ne’e tenke halo seguransa ho loloos, labele seguransa maka kontra fali seguransa, entaun ne’e esforsu no preokupasaun sira sei la vale.

Líder másimu instituisaun defeza ne’e informa, aleinde seguransa iha fronteira fraku, dalaruma mós timoroan sira falta nasionalizmu, patriotizmu, hodi fasilita krime organizadu.

“Dalaruma ami sira ne’ebé hanesan lutu ba nasaun ne’e, maka loke fali ko’ak ka leet atu ema bele infiltra ba ita-nia rain, liuliu ba forsa armada. Ha’u sempre tuur hamutuk ho sira, liuliu ho ofisiál sira, sempre apela ba sira, primeiru kona-ba sira ninia neutralidade ba relasaun ho situasaun polítika atuál, tenke hala’o ninia knaar loloos hanesan forsa defeza,” nia dehan.

Tanba ne’e, nia apela ba komandante sira hotu katak nu’udar ema, sempre sala-na’in tanba sempre komete sala maibé labele halo traisaun tanba Maromak la perdua.

“Ha’u sempre husu ba ha’u nia ofisiál sira, katak imi tenke leál ba instituisaun, leál ba imi-nia komandante, no leál ba Estadu no nasaun, tanba ida-ne’e mak importante ba ita. Ha’u tenta atu buka oinsá futuru jerasaun komandu ninian ne’e bele kumpre didi’ak ninia knaar, nu’udár lutu ba nasaun,” nia esklarese.

Nia salienta, Prezidente Repúblika mós preokupa hodi konkorda katak tenke asegura didi’ak forsa armada atubele sai lutu di’ak ba nasaun Timor-Leste.

“Ha’u dehan ba Xefe Estadu katak, ha’u prontu kolabora. Ha’u prontu impoin disiplina, prontu atu kontribui buat hotu atu serbi Estadu, ita-nia nasaun, no povu. Foti aas liu interese nasaun kompara ho individu ema ida nian. Ha’u mós dehan ba Prezidente Repúblika katak ha’u konfia ha’u-nia komandante sira iha instituisaun F-FDTL moris iha progresu no profisionalizmu nia laran,” nia haktuir.

Realmente, oras ne’e daudaun membru F-FDTL husi Unidade Polísia Militár ne’ebé destakadu iha Postu Fronteira Tunubibi hamutuk na’in-15.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here