Ministru Agrikultura no Peskas Joaquim José Gusmão dos Reis Martins.Imajen/Antonio Goncalves

DILI, 19 fevereiru 2020 (TATOLI) – Ministériu Agrikultura no Peska (MAP) hamutuk ho Diresaun Nasionál Estatístika (DNE), hahú halo reajustamentu ba dadus Sensu Agríkola iha munisípiu 12, inkui Rejiaun Administrativa Espesiál Oé-Cusse no Ambeno (RAEOA), molok lansa iha abríl tinan-ne’e.

Nune’e, MAP ho DNE deside halo reajustamentu ba dadus Sensu Agríkola tanba iha 2019, hahú jullu to’o dezembru iha sirkulasaun moras peste Áfrika (ASF-sigla Inglés) ne’ebé hamate fahi 16.000 iha teritóriu tomak.

Ministru Agrikultura no Peska, Joaquim José Gusmão Martins, informa ekipa MAP hahú reajustamentu no rekolla dadus ba sensu agríkola atubele halo lansamentu ho dadus kompletu.

“Ami nia ekipa tuun filafali ona ba kada munisípiu atu bele reajusta dadus hotu molok ita halo lansamentu iha fulan abríl,” tenik Ministru Joaquim ba Agência TATOLI iha Palásiu Governu,  kuarta ne’e.

Nia realsa, loloos atividade levantamentu dadus finaliza ona iha outubru 2019, maibé iha janeiru tinan-ne’e hahú halo reajustamentu tanba presiza kompleta dadus balun hanesan fahi komunidade nian mate, natar balun mota estraga no seluk tan.

“Populasaun sira nia fahi mate, ita tenke reajusta ka verifika didi’ak no iha mós seluk tan hanesan área natar sira ne’ebé mota sobu atu ita halo públikasaun ho dadus ne’ebé di’ak,” nia afirma.

Ministru adianta, tuir dadus provizóriu Sensu Agríkola iha diferente tanba bazeia ba dadus tinan-2015, populasuan ka família ne’ebé servisu iha área agrikultura ho porsentu 80, maibé dadus provizóriu Sensu Agríkola 2019 kuaze pursentu 74 mak iha vida agrikultura.

Ho nune’e, governante ne’e husu ba povu agrikultór sira atu bele fó resposta klaru, liuliu balada hira ne’ebé mate ba ekipa Sensu Agrikola.

“Ha’u hakarak husu fó resposta klaru, liuliu kona-ba rejista animál sira tanba resposta di’ak maka ita-nia futuru”, nia akresenta.

Atividade Sensu Agríkola hahú iha 12 agostu 2019 no hala’o ona durante fulan-ida no sei aumenta tan fulan-ida hodi haree ba dadus hotu hafoin iha abríl 2020 bele fó sai ona rezultadu.

Pergunta ne’ebé sei uza iha sensu ne’e hamutuk 102, liuliu iha área peska, floresta, rai, no pekuária tantu ki’ik ka boot.

Governu liuhosi MAP prevee orsamentu millaun $5 ba programa Sensu Agríkola.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here