Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu. Kuarta (19/02/2020). Imajen/TATOLI Egas Cristovao.

DILI 19 fevereiru 2020 (TATOLI) – Governu liuhosi desizaun Konsellu Ministru (KM) aprova ona proposta, ne’ebé mak aprezenta husi Ministru Reforma Lejizlativa no Asuntu Parlamentár, Fidelis Manuel Leite Magalhães, kona-ba kriasaun Komisaun Interministeriál ba preparasaun Sistema Indentifikadór Úniku Sidadaun.

“Objetivu husi sistema ne’e atu hasa’e prestasaun servisu ba sidadaun sira no atu asegura integridade dadus ba kada sidadaun. Sei iha númeru úniku ida ne’ebé atribui ba benefisiáriu no bainhira atribui númeru ne’e sei difikulta falsifikasaun dadus ema nian, tantu iha saida de’it. Ezemplu iha rejistu moris nian, iha direitu asesu ba pensaun sira hanesan inkluzaun sosiál ne’ebé boot no lansamentu ba Governasaun Eletrónika iha nível nasionál”, informa Ministru Fidelis iha Palásiu Governu, kuarta ne’e.

Governante ne’e realsa, komisaun téknika interministeriál sira ba preparasaun sistema ne’e maka Teknolojia Informasaun no Komunikasaun (TIC-sigla portugés) no Ministériu Justisa (MJ).

“Komisaun ida-ne’e sei konklui másima fulan-neen, kona-ba estratéjia integrada ba materializasaun husi sistema identikadór úniku ne’e rasik, hamutuk ho planu implementasaun detallu no respetivu orsamentu”, dehan Fidelis.

Biban ne’e, Ezekutivu sira mós aprova proposta Dekretu-Lei husi Organizasaun Administrasaun Direta no Indireta husi Estadu nian.

“Objetivu prinsipál husi intervensaun lejislativa ne’e mak atu organiza adekuadamente ba administrasaun direta no indereta iha Estadu nia rasik. Promove mós nia efikásia iha nia atuasaun no fasilita atu halo lais liu iha nia prosesu atividade”, nia subliña.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here