Sekretáriu Estadu Komunikasaun Sosiál, Merício Juvinal dos Reis 'Akara' inaugura Sentru Informasaun iha Suku Muapitine. Imajen/Natalino Costa

LAUTÉM, 18 fevereiru 2020 (TATOLI)–Governu liuhosi Sekretaria Estadu Komunikasaun Sosiál (SEKOMS), lansa Programa Naroman ba Suku no inaugura Sentru Informasaun iha Suku Muapitine, Postu Administrativu Lospalos, Munisípiu Lautém.

Ba atividade ne’e, SEKOMS prevee orsamentu $11.250 liuhosi transferénsia públika, kompostu husi $10.250 hodi reabilita Sentru Informasaun no $1.000 hodi hala’o Programa Naroman ba Suku.

Xefe Suku Muapitine, Lívio Mendes, informa objetivu husi Programa Naroman ba Suku maka atu divulga informasaun kona-ba atividade Governu, hodi tulun povu hatene kle’an kona-ba lala’ok governasaun, tanba ne’e líder komunitáriu ne’e kompromete sei tau-matan ba Sentru Informasaun, nune’e bele realiza programa hodi populasaun Muapitine bele asesu ba informasaun.

“Ha’u sei esforsu kolabora ho parte hotu hodi jere di’ak liután Sentru Informasaun iha Suku Muapitine. Nune’e, bele fó formasaun ba joven sira atu divulga informasaun ho loloos ba komunidade hodi akompaña prosesu tomak ne’ebé akontese iha ita-nia rai”, tenik Lívio Mendes iha seremónia lansamentu Programa Naroman ba Suku no inaugura Sentru Informasaun iha Suku Muapitine, tersa ne’e.

Biban ida ne’e, nia agradese ba apoiu husi parte SEKOMS tanba bele realiza ona programa ne’e.

Iha fatin hanesan, Prezidente Asosiasaun Veteranu Munisípiu Lautém, Aurélio Freitas, hateten Programa Naroman ba Suku hanesan inisiativa di’ak husi VIII Governu, tanba ne’e nia iha esperansa programa ne’e bele fó benefísiu ba komunidade Muapitine.

Nune’e, nia enkoraja parte hotu liuliu joven atu hamutuk jere Sentru Informasaun ho di’ak.

“Ha’u husu ba joven sira iha Suku Maupitine atu kuidadu materiál sira husi SEKOMS tanba sei fó benefísiu ba  ita”, nia akresenta.

Nia mós husu joven sira tenke aproveita oportunidade liuhosi formasaun atu kapasita-an atu bele iha abilidade.

Nune’e mós, Sekretáriu Estadu Komunikasaun Sosiál, Merício Juvinal dos Reis ‘Akara’, informa Programa Naroman ba Suku atu fasilita informasaun ba komunidade, tanba ne’e presiza joven sira-nia serbisu kooperativu.

“Ha’u husu komunidade, liuliu joven sira atu serbisu hamutuk liuhosi Programa Naroman ba Suku atu divulga informasaun ne’ebé klaru ba povu iha baze, liuliu  povu suku Maupitine atubele hatene no akompañia prosesu ne’ebé la’o iha Timor-Leste”, Akara subliña.

Nune’e, governante ne’e husu ba joven sira atu hamutuk kuidadu Sentru Informsaun iha Muapitine ne’ebé sei fasilita  povu atu akompaña nafatin informasaun ho di’ak kona-ba prosesu dezenvolvimentu ne’ebé la’o daudaun iha rai-laran.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here