Diretóra Jerál Prestasaun Saúde Ministériu Saúde (MS), Odete da Silva Viegas. Imajen Egas Cristovão

DILI,18 fevereiru 2020 (TATOLI)-Ministériu Saúde, tersa ohin halo avaliasaun ba resultadu implementasaun hosi programa Servisu Integradu Saúde Komunitária (SISCA) nota programa ne’e implementa ladun ho efetivu tanba falta orsamentu.

Ministériu Saúde ho Diretór Servisu Saúde Munisípiu 12 inklui Rejiaun Autónomu Espesiál Oé-Cuse Ambeno (RAEOA),Reprezentante Uniaun Europeia, UNICEF halo mós avaliasaun ba programa promotór saúde familia, grupu suporta inan, no voluntáriu saúde ne’ebé mak durante ne’e fó ona kontribuisaun maka’as ba implementasaun programa SISCA.

Iha deskursu Diretóra Jerál Prestasau Saude, Ministériu Saúde, Odete da Silva Viegas informa SISCA estabelese iha tinan 2009 liubá no hetan apoiu maka’as hosi Voluntáriu Saúde sira iha Suku.

“Polítika Ministériu saúde mak harii SISCA hanesan servisu integradu ne’e iha tinan 2009 entaun iha tinan 2015 ita harii saúde na família tan tanba ne’e mak servisu lubuk ida mak ita atu integra husi servisu sira ne’e,’’dehan, Diretora Jerál Prestasaun Saúde Odete da Silva Viegas, iha Institutu Nasionál Saúde (ICS-sigla portugés) Comoro ohin.

Odete da Silva Viegas relata programa SISCA ladun la’o di’ak tanba mós pesoál saúde sira laiha vontade hodi implementa programa ne’e ho rajaun falta orsamentu.

“Fó hanoin ba Diretór Munisípiu sira hanesan jestór ida ita tenke iha ideia ida para oinsá atu dezenvolve  programa sira ne’e tenke la’o ho regular,”Odete Apela.

Ministériu Saúde hetan apoiu orsamentu hosi doadór sira hanesan Uniaun Europeia ho UNICEF hodi suporta ba implementasaun programa SISCA no Kuidadu saúde Primária tanba ne’e persiza atu implementa ho seriedade.

Uniaun Europeia apoiu osan milloens 15 ba Ministériu Saúde hodi implementa programa hirak ne’e. Millaun 5 apoiu tékniku ba MS no 10 aloka liuhhosi Ministériu Finansa hodi implementa programa ministériu nian.

Jornalista : Felicidade Ximenes

Editór     : Agapito dos Santos

HAKEREK NO HATÁN

Please enter your comment!
Please enter your name here