DILI, 18 fevereiru 2020 (TATOLI) – Ró Kruzeiru Coral Adventure ho pasajeiru hamutuk na’in-85 husi Austrália, iha tuku 12.00 meiu dia ne’e, atraka ona iha Portu Dili durante oras neen nia laran, hodi turista sira bele vizita fatin balun iha sidade Dili.
Pasajeiru Ró Kruzeiru, Steven Philip (65), espresa ninia sentimentu bainhira foin dahuluk vizita Timor-Leste.
“Ha’u foin mai dala-ida no haree Timor-Leste nia paizajen ne’e furak tebes, tasi kapas loos no sei naturál”, tenik turista ne’e ho hamnasa, iha Merkadu Tais Colmera, tersa ne’e.
Iha fatin hanesan, Negosiante iha Merkadu Tais Colmera, Jacinto Barros, hateten vizita Ró Kruzeiru ne’e fó benéfisiu ba negosiante sira tanba turista hola tais no sasan artezenatu seluk tan.
“Sira mai balun hola no balun haree de’it. Sira hola karteira ne’ebé suku ho tais Timór no balun hola sapeu ho folin $5 mai karaik de’it”, nia informa.
Maski nune’e, negosiante ne’e sente kontente tanba ho vizita turista sira ne’e bele fó benefísiu ekonómiku ba sira hodi sustenta moris loron-loron nian.
Parte seluk, Diretór Jerál Turizmu iha Ministériu Turizmu, Komérsiu no Industria (MTKI), José Filipe Dias Quintas, informa ohin Ró Kruzeiru Coral Adveture ho klasifikasaun luxu husi Austrália ho pasajeiru na’in-58 to’o iha Timór tuku 12:00 no sei fila iha tuku 6:00 lokraik.
“Ita espera ho prezensa ró ida-ne’e, bele ajuda promove ita nia imajen nu’udar destinasaun turistíku ida foun, no importante liu maka ita hotu nia kontribuisaun atu promove imajen Timor-Leste”, dehan Dirijente ne’e.
Ho nune’e, José Filipe agradese ba parseiru sira hotu ne’ebé apoia no organiza vizita Ró Kruzeiru sira.
“Ita hotu tenke kontribui atu pás no estabilidade atu ita nia destinasaun turisítika sai seguru no hakmatek hodi atrai turista sira”, nia salienta.
Turista Ró Kruzeiru ne’e, konsege vizita sitíu turistíku hanesan Cristo Rei, Semitériu Santa Cruz, Muzeu Rezisténsia, Sentru Nasionál CHEGA (CNC-sigla portugés) no Merkadu Tais Colmera.
Ró Kruzeiru Coral Adventure ho klasifikasaun luxu vizita Timor-Leste ho totál pasajeiru 85, turista de’it na’in 49 no tripulante 36, maioria sidadaun Austrália.
Antes ne’e, iha 5 fevereiru, Ró Kruzeiru Pacific Explore ho pasajeiru 2.945, kompostu husi totál turista 2.072 no tripulante 873, ne’ebé maioria sidadaun Austrália no Timoroan na’in-30, vizita Timor-Leste.
Jornalista: Florencio Miranda Ximenes
Editora: Julia Chatarina
