iklan

NASIONÁL, HEADLINE, POLÍTIKA

Xefe Estadu Enkoraja Tribunál Labele Influensiadu

Xefe Estadu Enkoraja Tribunál Labele Influensiadu

Prezidente Tribunal Rekursu, Deolindo dos Santos. Imajen Tatoli/Antonio Goncalves.

DILI, 17 fevereiru 2020 (TATOLI)—Prezidente Repúblika (PR), Francisco “Lú Olo” Guterres, enkoraja nafatin parte tribunál sira atu mantein funsionamentu normál no labele influensiadu ho diverjénsia polítika hodi fó justisa ne’ebé di’ak ba povu tomak.

“Maske ho difikuldade ne’ebé mak ita enfrenta ho orsamentu duodésimu no situasaun polítika ne’ebé mak iha maibé Prezidente Repúblika enkoraja nafatin atu nune’e tribunál sira tenke funsiona normál nafatin atu bele fó justisa ne’ebé di’ak ba povu Timor tomak,” dehan Prezidente Tribunál Rekursu (PTR), Deolindo dos Santos, ba jornalista sira hafoin hala’o enkontru mensál ho Xefe Estadu iha Palásiu Prezidensiál Bairru-Pité, Dili, ohin.

Nia informa, Prezidente Repúblika hanesan aman ba nasaun konsidera tribunál hanesan aliserse ba Estadu ida ne’e, entaun maske bele iha diferensa polítika husi polítiku na’in sira maibé Tribunál labele falla hodi asegura leí no konstituisaun.

“Kona-ba ne’e, ha’u hato’o ba Prezidente Repúblika katak ha’u rasik ho kolega juís sira sei asegura nafatin. Katak, buat ne’ebé Tribunál nian ne’e Tribunál nian duni, labele influensiadu ho perspetiva polítika ne’ebé mak la’o. Ami mantein la’o nafatin tuir korridór ne’ebé mak iha tuir konstituisaun no leí sira ne’ebé establese ona,” nia hateten.

Líder másimu Tribunál ne’e subliña katak, iha prinsípiu mensajen ne’ebé Prezidente Repúblika hato’o ne’e di’ak ba Tribunál nomós di’ak ba povu tomak.

Jornalista : Cipriano Colo

Editór      : Cancio Ximenes

iklan
iklan

Leave a Reply

iklan
error: Content is protected !!