Reprezentante OMS iha Timor-Leste, Rajesh Pandav. Imajen Egas Cristovão

DILI, 17 fevereiru 2020 (TATOLI)-Organizasaun Saúde Mundiál (OMS), segunda (17/02/2020), halo ona enkontru ho Primeiru-Ministru, Taur Matan Ruak ho ekipa task force kompostu hosi liña ministeriál sira hodi koa’lia kona-ba planu asaun ba prevensaun coronavirus iha Timor-Leste.

Ekipa Task Force ne’e kompostu hosi Minsitériu Saúde, Ministériu Finansa, Sekretáriu Estadu komunikasaun Sosiál (SECOMS-sigla portugés), Ministériu Negósiu Estranjeiru no Kooperasaun(MNEK), Ministériu Administrasaun Estatál, Ministériu Edukasaun Juventude no Desportu, Ministériu Agrikultura, Xefe Estadu Maiór FALINTIL-Forsa Defesa Timor Leste (F-FDTL) no Komandante Jeral PNTL.

Reprezentante Organizasaun Mundiál Saúde iha Timor Leste, Rajesh Pandav, informa tuir relatóriu OMS nian fó sai katak populasaun hamutuk 51.174 iha Xina maka hetan infesaun ba  coronavirus no hosi númeru ne’e, ema na’in 1676 maka mate ona.

“OMS Reuniaun ho Primeiru Ministru ho Membru Governu sira kona-ba Coronavirus no oinsá atu forma ekipa task-force ida para oinsá atu prevene moras corona mai iha Timor Leste,”katak, Rajesh Pandav, iha Palasiu Governu Dili.

Ekipa task-force ne’e atu koordena servisu hamutuk ho membru governu hotu-hotu, liliu kria mekanizmu koordenasaun, fasilidade no fatin kuarentena hodi fó tratamentu ba pasiente sira bainhira identifika afeta ona ba coronavirus.

“Servisu sira ne’ebé mak halo sempre apoiu husi Organizasaun Mundiál Saúde entaun fasilidade ne’ebé mak iha ita bele garante katak hala’o tuir servisu tuir ita-nia padraun ne’ebé mak iha,”tenik, Reprezentante Organizasaun Mundiál Saúde.

Iha fatin hanesan ViseMinistra Kuidadu Saúde Primária, Elia dos Reis Amaral, hateten Ministériu Saúde koordena ona ho Parseiru Dezenvolvimentu sira atu oinsá haree liu ba medidas prevensaun.

Governante dehan tan  iha loron 23 fulan-fevereiru 2020, importasaun ekipamentus ba prevensaun no tratamentu ba pasiente coronavirus sei to’o iha Timor-Leste tanba hetan apoiu hosi OMS.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here