Doutora Obstretrícia no Gineconolojia, Amita Thampa.Imajen Espesial.

DILI, 17 fevereiru 2020 (TATOLI)-Antiga Doutora Obstretrícia no Gineconolojia, Ospitál Nasionál Guido Valadares (HNGV-sigla portugés,) Amita Thampa hosi Nasaun Nepál, iha domingu (16/02/2020) hakotu ona iis tanba sofre moras pulmaun.

Matebian hakotu iis iha ninia Rezidénsia Praia dos Coqueiros Dili, iha tuku 2:30 Otl;.Doutora ne’e hahú servisu ona iha HNGV iha tinan 2004 to’o 2017.

Diretór Klínika HNGV, Flavio Brandão hateten, matebian moras durante fulan hirak ona maibé nia la abandona  ninia knaar nu’udar médika espesialista liliu ba atende pasiente inan isin rua no labarik ki’ik.

“Durante nia moras ne’e iha uma de’it maibé nia kontinua servisu ho limitasaun ho moras ne’ebé mak iha  to’o nia husik iis iha uma la’os iha HNGV,” hateten Flavio Brandão ba jornalista sira iha HNGV, Dili, ohin.

Flavio Brandão observa katak durante ne’e, maski sofre moras krónika maibé la’ós bareira  ida ba nia tanba kontinua presta servisu ba pasiente sira ho di’ak.

“Médiku loloos mak hanesan nia ne’ebé mak haluha nia fatin (nia nasaun) bá servisu iha fatin seluk hodi  serbí ho laran ho dedikasaun tomak,” Diretór ne’e realsa liután.

Diretór ne’e ho laran triste hato’o ninia sentida kondolénsia profunda ba família matebian atu simu realidade ne’e.

Iha fatin hanesan, Oan Feto hosi Matebian, Smriti Basnyat, haktuir Doutora Amita Thampa, sofre moras pulmaun no iis boot durante fulan neen ona.

Tuir planu, serimónia fúnebre ba matebian nia-isin mate sei haloot tuir tradisaun nasaun Nepál nian maka tenke sunu ne’ebé maka sei hala’o iha kuarta (19/02/2020) iha Dili, maibé kona-ba fatin fúnebre família seidauk deside.

Perfíl

Amita Thampa Moris iha Kathmandu Nepál, iha loron  23 fulan-agostu 1956, matebian iha oan na’in-tolu, mane ida no feto na’in rua.

Matebian hahú ninia profisaun iha Timor-Leste hosi Tinan 2004-2017 iha Hospital Nacional Guido Valadares Dili hanesan Médiku Espesialista ba  Obstretrícia no Gineconolojia no hanesan mós Eis Xefi Departamentu Maternidade HNGV iha Tinan 2017.

No iha tinan 2010, médiku espesialista Amita Thampa hetan konfiansa hosi HNGV hodi fó formasaun ba parteira iha territóriu Timor-Leste iha programa Emergency Obstetric Care (EMONC) hodi salva inan isin rua.

Iha tinan 2012, hanesan konsultora ba Obstretrícia no Gineconolojia iha HNGV. Iha tinan 2014, hanesan Xefe Departamentu Obstretrícia no Gineconolojia. No mós  suporta atividade saúde reprodutiva husi programa Ministériu Saúde nian no kolabora hamutuk ho United Nations Population Fund (UNFPA).

No iha tinan 2017, Matebian servisu ho Organizasaun Saúde Mundiál iha Timor-Leste(WHO-sigla inglés), no servisu iha Klínika Marie Stopes no ikusliu servisu iha  Dili Medical Center.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here