Atividade kolleita Manu Broiler iha Koronél Domingos Câmara ‘Amico’ ninia luhan iha Metinaro. Imajen/Natalino Costa

DILI, 17 fevereiru 2020 (TATOLI) Prezidente Movimentu Asaun Ekonomia Komunitária (MAEKOM), Rui Castro, hamutuk ho Ministru Agrikultura no Peska, Joaquim José Gusmão dos Reis Martins, no ekipa sira kolleita tan Manu Broiler hamutuk 2500, iha Koronél Domingos Câmara ‘Amico’ ninia luhan, iha postu administrativu Metinaro, Dili.

Iha atividade kolleita ba dasiak ne’e, Veteranu Amico apresia inisiativa grupu MAEKOM ne’ebé liuhosi investimentu iha setór pekuária, bele eduka sidadaun sira atu kontribui ba ekonomia.

“Kolleita manu ida-ne’e, hanesan motivasaun di’ak ida ba ami hakiak-nain sira atu badinas liután hodi bele kontribui ba ekonomia iha ita-nia rai no família, nune’e bele fó mós serbisu ba maluk sira”, diskursu Koronél Amico iha atividade kolleita Manu Broiler, segunda ne’e.

Nia refere tan, dala barak iha hanoin atu hadi’ak ekonómia maibé realidade iha prátika mak sei menus.

“Bainhira ko’alia atu kontribui ba ekonómia, ko’alia maka barak maibé kuandu ita la tau ba prátika ne’e difísil atu hadi’ak família nian ekonomia”, nia akresenta.

Iha fatin hanesan, Prezidente MAEKOM, Rui Castro agradese tanba Koronél Amico hakarak integra ona hanesan membru hodi hakiak Manu Broiler.

“Ha’u apresia inisitiva Koronél Amico, maski nia ema ho deviza boot maibé hakarak halo negósiu ho Manu Broiler rasik”, nia realsa.

Nune’e mós, Prezidente Kámara Komérsiu Industria Timor-Leste (CCI-TL, sigla portugés), Oscar Lima, apresia inisiativa Koronél Amico tanba haree ba ninia knaar hosi instituisaun militár no hanesan veteranu ida, maibé hakarak halo investimentu liuhosi hakiak manu.

Tanba ne’e nia konsidera, ida-ne’e hanesan parte ida ne’ebé aban bain-rua bele haforsa ekonomia família no bele benefisia ba ema-hotu iha kontestu kontribuisaun ekonomia iha Timor-Leste.

Iha atividade kolleita ne’e, Ministru Joaquim sente orgullu ho hanoin Koronél Domingos Câmara, ne’ebé hakarak investe iha área pekuária nu’udar esforsu ida atu hasa’e ekonomia uma-laran no bele eduka joven sira katak bainhira atu halo investimentu.

Iha atividade kolleita ne’e, partisipa mós Prezidente CCI-TL, Oscar Lima, Membru Komisaun D (trata asuntu Ekonomia no Dezenvolvimetu) balun, Autoridade Metinaro, no komunidade sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here