Emposada kargu xefia IADE asina dokumentu posse ne’ebé akompaña hosi MKAE interinu, Fidelis Manuel Leite Magalhães no Prezidente KFP, Faustino Cardoso, ne'ebé hala'o iha salaun IADE, Bebora, Tersa (11/02/2020). Imajen TATOLI/Antónia Gusmão.

DILI, 14 fevereiru 2020 (TATOLI)-Prezidente Komisaun Funsaun Públika, Faustino Cardoso, sesta ohin, fó pose ba kargu xefia na’in haat hodi kompleta estrutura instituisaun nian ba periodu tinan haat hahú hosi 2020 to’o 2024.

Kargu Xefia na’in haat ne’e kompostu hosi Xefe Gabinete Apoiu Sekretáriu Ezekutivu Nasionál, Maria da Costa Oliveira, Xefe Unidade Jurídika, Fausto Freitas da Silva, Sub Inspetór Diresaun Nasionál, Manuel da Silva no Xefe Departementu Teknólojia Informátika, Edgar Maria Rego Magno.

Presidente komisaun Funsaun Públika, Faustino Cardoso husu ba emposadu sira hodi asume kargu ne’e ho responsabilidade atu serví estadu no povu.

“Atu fo mensajen ba imi atu hala’o kna’ar foun ne’e serví ho responsabilidade, no ejize imi atu kria konvivensia  ne’ebé saudavel iha servisu fatin atu asegura susesu servisu sira,”apela Prezidente KFP, Faustino Cardoso iha ámbitu serimonia tomada pose iha salaun Komisaun Matadouro Dili,ohin.

Nia mós enkoraja emposadu foun sira atu hatudu dezempeñu servisu iha instituisaun hodi serví administrasaun públiku tuir interese komún la’os interese pesoál, grupu no partidaria.

“Imi selesionadu ho vaga pór meritu duni tanba ne’e hatudu duni dezenpeñu liutan la halis kor  ka  grupu maibé haree ba interese estadu no povu nian, hanesan komisaun funsaun públika tenke hatudu ezemplár ba instituisaun sira seluk atu garante selesaun tuir meritu,”tenik tan.

Rekrutamentu ne’e baseia ba númeru 7/2009 15 Jullu  hodi fó kompetensia ba KFP atu halo rekrutamentu, nomeasaun no promosaun baseia ba selesaun méritu iha administrasaun públika, durante mandatu tinan ha’at.
Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here