Familia Administradór Postu Zumalai, Matebian Santiago Berreto “Tato Meta” mate iha loron iha loron 13 fevereiru 2019 to'o agora seidauk iha nia rezultadu investigasaun. Imajen/Dok. Espesiál

DILI, 14 Fevereiru 2020 (TATOLI)-Komandante Jerál Polisia Nasional Timor-Leste (PNTL), Komisáriu Faustino da Costa, iha tempu badak nia latan, sei bolu Komandante Polisia Investigasaun Munisípiu Covalima, atu bele buka solusaun ba kazu oho Administradór Postu Zumalai, matebian Santiago Berreto “Tato Meta” ne’ebé to’o ohin loron sei mistériu.

Komandante Jerál PNTL, Komisariu Faustino da Costa. Imajen /Antonio Goncalves

“Ami simu ona informasaun no lamentasaun husi família sira, iha tempu besik, ita sei halo enkontru ho komandante no investigadór sira hodi haree ninia prosesu,” afirma Komisáriu  Faustino da Costa, hodi responde jornalista kona-ba lamentasaun família matebian ne’ebé to’o agora seidauk  fó sai rezultadu investigasaun kona-ba mate mistériu ne’e.

Família sira deskonfia kazu oho Administradór Zumalai, Santiago Barreto iha loron 13  fevereiru 2019, too agora la prosesa ba tribunál, tanba deskonfia investigadór polisia balun hakarak taka prosesu ba kazu ne’e.

Ho lamenta saun ne’e, Família Saudozu Administradór Zumalai, Dinis Barreto D. Santos,  husu ba Komandu PNTL atu loke investigasaun ba membru polisia sira hodi buka hatene razaun loloos husi prosesu kazu ne’e.

“Ami ezije ba Komandante Jerál PNTL Komisáriu Faustino da Costa atu urjente halo avaliasaun servisu ba membru PNTL ne’ebé balun hala’o knaar la imparsiál hodi halo intervensaun ba prosesu investigasaun ba Saudozu Santiago Barreto nia mate ne’ebé too agora la iha rezultadu,”  afirma Dinis Barreto.

Família sira mós ezije ba Ministériu Públiku Munisípiu Covalima atu hasai mandatu kapturasaun ba autór balun ne’ebé deskonfia oho administradór ne’e.

Família sira ezije mós Komandante Munisípiu Covalima atu entrega evidénsia forte ne’ebé hetan husi pesoál Servisu Sekretu durante sira hala’o knaar iha terrenu no husu ba parte Ministériu Públiku Covalima labele halo manipulasaun ba evidénsia kona-ba saudozu nia mate.

Parte seluk, família sira aprezenta mós keixa ba Komisaun B Parlamentu Nasionál Asuntu Defeza no Seguransa no Provedora Direitu Umanu no Justisa (PDHJ) ho urjente akompaña kazu ne’e. Tanba família  konsidera matebian nu’udar veteranu no antigu kombatente no lider partidu polítiku iha Zumalai.

Antes ne’e, Komandante Polisia Munisípiu Covalima Superintendente, António Maria de Sá deklara liu husi diálogu nasionál entre povu no Prezidente Repúblika, Francisco Guterres Lú Olo,   iha Covalima katak kazu ne’e sei iha prosesu investigasaun nia laran.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here