DILI, 13 fevereiru 2020 (TATOLI)–Senadu Universidade Oriental (UNITAL) hamutuk ho estudante sira husi Fakuldade ualu (8) hala’o limpeza jerál iha tasi ibun área Ponte Prezidente BJ Habibie to’o iha resintu Unidade Polisia Marítima (UPM) nian hodi hatudu sira-nia domin ba natureza iha Valentine Day ka loron domin ne’e.

“Ami hakarak introdús ba públiku katak Valentine Day ka loron domin nian ne’e laos entre ema ho ema de’it maibé bele fó ba nasaun no mós ba natureza,”  Senadu Estudantil UNITAL, Gilberto Caldas, ba jornalista sira iha Jardin Prezidente BJ Habibie, Bidau, kinta (13/02/2020).

Tuir nia, domin la’os haree de’it ba aan rasik maibé oinsá mak bele introdus ba ema seluk. Signifika, nia dehan, ema ida iha ona konsiénsia hodi kaer lixu ida iha nia liman ba tau iha ninia fatin bele ona kontribui ba dezenvolvimentu rai ida-ne’e no moris saudavel ema hotu nian.

Tan ne’e, nia hatutan, UNITAL aproveita oportunidade iha loron importante ida ne’e hodi konsentra ninia preokupasaun ba ambiente liu husi atividade limpeza jerál ne’e nu’udar domin ba natureza no mós ba nasaun.

“Ami hili fatin Ponte Prezidente BJ Habibie husi tasi ibun ba to’o resintu UPM nian tanba fatin ne’e mak dala barak sai risku husi hahalok ema nian hodi halo foer no soe foer nune’e leet de’it,” nia dehan.

Nia esplika, kontribuisaun UNITAL nian iha atividade ne’e nu’udar meiu ida atu apoiu programa VIII Governu Konstitusionál nian liuhusi kampañia zero plastiku.

Tan ne’e, tuir nia, atividade limpeza jerál ne’e haree liu ba plastiku, hena a’at no aqua fatin sira tanba elementu sira ne’e mak nunka fó bokur ba rai.

Aleinde hala’o limpeza jerál, nia informa, UNITAL mós hala’o asaun karidade ba ema ho defisiénsia hodi halo kanalizasaun bee-moos hahú iha loron 10 fevereiru no termina iha loron 12 fevereiru.

“Ita termina ona asaun karidade kanalizasaun bee-moos ba maluk defisiente matan hamutuk na’in 300 horisehik iha Becora no agora sira bele utuliza fasilidade sira ne’e ho domin,” nia hateten.

Entertantu, nia informa, atu taka atividade hirak ne’e, iha loron domin ne’e UNITAL mós realiza reflesaun hamutuk iha 14 fevereiru ho tema sentral “Hametin Unidade Paz iha Estrutura Fundasaun. Estrutura Reitórial, Doente, Estudante no ema defisiénsia.”

Reflesaun ida ne’e, tuir nia, atu fanu ita hotu katak domin iha ninia sentidu ne’ebé luan entre ema ho ema, ema ho serbisu no mós ema ho natureza maibé domin ne’e atu sai boot tenke mai husi fuan.

“Nu’udar sidadaun ida ne’ebé di’ak tenke fó kontribuisaun ba nia rain rasik. Ema hotu mak iha ona konsiénsia hodi soe lixu iha ninia fatin para iha futuru bele garante katak sei la akontese tan inundasaun,” nia esplika.

Nia informa, fakuldade ualu ne’ebé mak partisipa iha atividade sira ne’e hanesan fakuldade Edukasaun, Agrikultura, Sispol, Siência Tekníku, Saúde, Rekursu Naturais no Minarais, no Ekonomia.

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here