Primeiru-Ministru, Taur Matan Ruak. Imajen Tatoli/ Egas Cristovão

DILI, 13 fevereiru 2020 (TATOLI)–To’o oras ne’e Timor-Leste (TL) seidauk sofre Coronavirus no kondisaun estudante timoroan na’in 17 iha Kuarentena Nova Zelándia, saudável hela. 

Primeiru-Ministru (PM), Taur Matan Ruak atualiza novidade ne’e ba Prezidente Repúblika (PR), Francisco Guterres Lú Olo, iha enkontru semanál ne’ebé hala’o iha Palásiu Prezidente Nicolau Lobato, Bairru Pité, Dili, ohin.

“Enkontru semanál ho Prezidente Repúblika, primeiru, ko’alia de’it kona-ba problema Coronavirus liuliu situasaun estudante sira na’in-17. Felizmente ita-nia rain, ita seidauk sofre. Segundu, ita-nia estudante sira oras ne’e daudaun nia kondisaun di’ak hela. Se buat hotu la’o di’ak, entaun loron hira tan sira bele fila mai. Tanba, oras ne’e daudaun, ita mós seidauk simu informasaun ruma katak estudante hirak-ne’e pozitivu ka lae”, Taur esplika.

Antes ne’e, bolseiru timoroan husi Munisípiu Lautém ho naran Nicodino da Cruz ne’ebé oras ne’e hamutuk ho nia estudante maluk 16, ba TATOLI liuhusi mídia sosiál hateten, sira hetan tratamentu di’ak tebes husi autoridade kompetente iha Nova Zelándia, no mós sira na’in-17 tuir ona medically check, rezultadu hatudu katak na’in-17 livre husi Coronavirus.

Estudante timoroan na’in-17 ne’e, antes ne’e, agradese ona ba Governu Timor-Leste no Governu Nova Zelándia tanba ho esforsu tomak halo evakuasaun ba sira husi sidade Wuhan, Xina.

Estudante hirak-ne’e, oras ne’e sei hela iha kuarentena ka baraka militár Whangaparaoa iha Norte Auckland, Nova Zelándia.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here