Ai-nanas ne’ebé fa'an iha Loja Agrikultór. Imajen/Florencio Miranda Ximenes.

DILI, 12 fevereiru 2020 (TATOLI)–Diretór Nasional Asuntu Sosiál Eskolár (DNASE) Belchior Maria Almeida Guera informa, revizaun Manuál Merenda Eskolár (ME) ne’e bandu menu “ayam potong” no “Supremie” hodi fornese ba labarik sira iha eskola maibé troka ho hahan produtu lokál seluk ne’ebé iha nutrisaun.

Atu proteze labarik sira, nia hatutan, DNSSE fó ona biban ba eskola ida-idak atu identifika hahan ne’ebé besik iha sira-nia eskola ho kategoria iha nutrisaun mak bele fornese ba labarik sira.

“Iha revizaun Manuál ME ne’e ami tau de’it hahan ne’ebé mak iha vitamina, hahan ne’ebé fó forsa no fó protesaun. Ami sei la fó tan ayam potong no supremie,” dehan Belchior Maria Almeida Guera ba jornalista sira iha edifisiu Ministériu Edukasaun, Juventude no Desportu (MEJD), Vila Verde, Dili, tersa (11/2/2020).

Tuir VIII Governu Konstitusionál nia polítika, nia dehan, hakarak promove produtu lokál maibé husik ba eskola sira mak hili maibé naran katak labele kontra Manuál Merenda Eskolár  ne’ebé halo ona revizaun.

Nia informa, oráriu merenda eskolár ba eskola sira iha Timor-Leste agora daduun la hanesan tanba bazeia orsamentu ne’ebé aloka ba kada munisípiu ka kada eskola.

“Eskola balun implemnta loron 10 balun loron sia (9) no eskola seluk fali loron lima (5) de’it tanba orsamentu duodésimu. Iha Viqueque, eskola sira implementa loron lima (5) de’it tanba sira hetan alokasaun orsamentu ho montante rihun $32 de’it. Maibé iha Manufahi, implementa loron sia (9) tanba orsamentu Merenda Eskolár  ne’e iha rihun $42,” nia infroma.

Maibé, nia hatutan, agora daudaun Merenda Eskolár ne’e rasik sei kontinua responsalbliza husi inan-aman sira hodi hein to’o elaborasaun Manuál ne’e ramata hafoin bele implementa tuir polítika ne’ebé iha.

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here