Kapitaun ekipa  Boavista FC Timor, Nataniel Reis. Imajen espesiál

DILI, 13 fevereiru 2020 (TATOLI)–Daudaun ne’e maioria klube komesa prepara an ona atu kompete iha Liga Futeból Amadora (LFA) époka dalimak iha tinan ne’e. Maibé, klube zigante Boavista FC Timor seidauk iha preparasaun.

Tanba ne’e, kapitaun ekipa  Boavista FC Timor, Nataniel Reis hateten bainhira klube refere la bolu nia sei joga fali iha klube seluk ne’ebé presiza nia.

“Ha’u to’o agora seidauk rona informasaun ruma hosi Boavista katak ami sei kontinua ka lae. Jogadór barak mak sai ona ba klube seluk. Maibé, Boavista la bolu ha’u sei joga fali iha klube seluk,” Nataniel ba Agência Tatoli via rede sosiál, kinta ne’e.

Nia dehan, hanesan jogadór kontinua prepara an hodi kuidadu kondisaun atubele partisipa iha LFA époka ne’e maski seidauk hatene atu hamutuk ho klube ida-ne’ebé.

Eis jogadór selesaun nasionál seniór ne’e hamutuk ho Boavista iha époka primeiru bainhira Boavista sei naran Carsae FC, iha ne’ebé Nataniel mós ho nia kontribuisaun iha liña médiu másimu tebes nune’e 2018 konsege lori Boavista sai kampiaun LFA no Super Tasa.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here