Membru F-FDTL na’in 23 tuir kompetisaun tiru ka Atiradór Espesiál (SNIPER) iha Sentru Karrega Tiru Metinaro, Dili. Imajen/Eugénio Pereira

METINARO, 12 fevereiru 2020 (TATOLI)- Membru FALINTIL-Forsa Defeza Timor-Leste (F-FDTL) na’in 10 selesionadu tuir kompetisaun tiru iha Austrália  ne’ebé sei hala’o iha loron 21 marsu 2020.

Membru FALINTIL-Forsa Defeza Timor-Leste (F-FDTL) na’in 10 selesionadu tuir kompetisaun tiru iha Austrália. Imajen/Eugénio Pereira

Timoroan na’in 10 nee reprezenta F-FDTL no Timor-Leste iha kompetisaun internasionál Australian Army Skill at Arms Meting (ASSAM)m hafoin selesionadu tuir kompetisaun tiru ka atiradór espesiál (Sniper).

 Membru sira ne’e hetan valór di’ak hafoin hamutuk ho membru na’in 23 hodi tuir kompetisaun tiru ba tinan 2020 nian ne’ebé organiza husi Komandu F-FDTL koopera ho ASSAM durante semana ida iha Sentru Karrega Tiru Metinaro, Dili.

Iha kompetisaun ne’e, ekipa tékniku F-FDTL no Forsa Austrália koko membru sira nia kapasidade hodi tiru alvu (sasaran), téknika tiru hamriik, toba no hakne’ak uza Pratika Tiru Rápidu metru 300, Pratika Tiru Kombate Besik metru 25 no Pratika Tiru Batalla metru 100 too metru 300 ho tempu minutu (neen) 6 de’it.

Kompetisaun ne’e uza kilat M4 ho téknika manuál uza matan maka fihir no la uza teleskópiu ho tempu minutu neen (6), kandidatu sira tenke uza tempu másimu ho rápidu para tiru alvu ne’ebé ekipa monta ona hodi avalia kandidatu sira nia kapasidade no profisionalizmu tékniku.

Ba tinan ida ne’e, kompetisaun tiru manan husi membru F-FDTL, Zaulino da Silva (Komponente Navál), Angelino dos Reis Amaral (Komponente Navál), Sonio Joaquim da Silva Amaral (Polisia Militár), Francisco Xavier Verdial (Komponente Terrestre), Domingos Caetano (CFT), Mariano Alexandre Bernardino (CFT), Josias de Araújo Gomes (Komponente Navál), Mateus da Cunha (CAS), Francisco Alves (CT), Jaime de Jesus dos Santos (CFT).

Komandante Komponente Formasaun no Treinu CFT Metinaro, Tenente Koronél Cesário Ximenes Belo “Haksolok’ hato’o agradese ba forsa Austrália hodi lori membru sira tuir kompetisaun ASSAM.

“Ha’u agradese tebes ba kooperasaun Austrália no Timor-Leste ne’ebé tinan-tinan sempre suporta ami, tanba ami nia nasaun foin maka harii, se ami mesak de’it atu ba tuir kompetisaun ami labele, maibé kooperasaun ne’e apoiu tebes ami ho Austrália, Portugál no Nova Zelándia hodi apoiu ami la’o ba oin,” Komandante Haksolok agradese.

Komandante ne’e husu ba membru sira ne’ebé tuir kompetisaun, maibé lakon atu labele lakon esperansa, maibé tenke fiar aan tuir treinu makas hodi kompete iha tinan oin.

Ba membru na’in 12 ne’ebé sei ba tuir kompetisaun iha ASSAM Austrália, Komandante Haksolok, espera, sira sei fila ho vitória hodi lori susesu no hamorin naran di’ak Timor-Leste ba mundu.

“Imi ne’ebé liu reprezenta Timor, ha’u rekomenda ba imi buka meius bele lori netik buat ruma mai iha F-FDTL,” nia  apela.

Iha fatin hanesan, Adidu Defeza Austrália ba Timor-Leste, Richard Watson hato’o agradese no parabéns ba membru sira ne’ebé manan ona hodi prepara aan ba tuir kompetisaun iha Austrália.

Treinadór ASSAM, Tenente Joel de Jesus, dehan, membru sira ne’ebé manan ona sei kontinua tuir kompetisaun tiru hodi prepara sira nia aan ho di’ak liután molok arranka ba tuir kompetisaun tiru internasionál.

“Parabéns ba imi sira ne’ebé manan sei kontinua treinu tan molok arranka ba Austrália,” nia informa.

Biban ne’e, Segundu Komandante Atiradór Espesiál (Sniper) F-FDTL, Alferis Verdial da Costa dehan, kompetisaun halo partisipa husi unidade F-FDTL hotu-hotu haruka reprezentante na’in 23 no iha prosesu kompetisaun na’in  11 sai no na’in 12 maka hetan kategoria tiru di’ak no dixiplina.

Nia dehan, ajenda membru 10 ne’ebé sei ba tuir kompetisaun sei akompaña husi, Treinadór ASSAM, Tenente, Joel de Jesus no Segundu Komandante Atiradór Espesiál (Sniper) F-FDTL, Alferis Verdial da Costa.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here