Membru Bankada CNRT, Adérito Hugo da Costa. Imajen Tatoli/Egas Cristóvão

DILI, 13 fevereiru 2020 (TATOLI)—Reprezentante povu sira iha Uma-Fukun Parlamentu Nasionál (PN) espera Prezidente Repúblika (PR), Francisco Guterres ‘Lú Olo’ iha ona preferénsia hodi foti desizaun solusiona inserteza polítika iha rai-laran.

“Oras ne’e Prezidente Repúblika halo hela medida komunikasaun ho kamada polítika no sosiedade hotu-hotu. Tan ne’e, ita hein katak Prezidente Repúblika iha ona preferénsia ruma para fó solusaun ba asuntu ida-ne’e,” Deputadu Bankada Parlamentár Congresso Nacional de Reconstrução de Timor (CNRT), Adérito Hugo da Costa, informa ba jornalista sira, iha resintu Parlamentu Nasionál, kinta ne’e.

Fatin hanesan, Xefe Bankada Parlamentár Partidu Demokrátiku (PD), António da Conçeição, hateten movimentu polítiku iha Parlamentu la’o ona maibé asaun atu hetan rezultadu ne’e mak sei hasoru dezafiu boot.

“Tanba, tuir konstituisaun ne’e loron 60. Agora loron 60 ne’e ita sura hosi xumbu orsamentu nian iha 17 janeiru no ohin 13 fevereiru tiha ona. Purtantu, semana rua tenkeser iha ona solusaun. Se laiha, pasiénsia ita hein Prezidente Repúblika deside tanba partidu sira laiha kapasidade atu ko’alia ba malu”, Xefe Bankada PD ne’e tenik.

Nia afirma, koligasaun bele mosu karik atu forma Governu ne’e bele maibé kestaun la’ós atu iha de’it governasaun ida monu para ida sa’e ne’e.

“Ita hakarak ne’e tenke iha estabilidade governativa ida, ita hakarak realizasaun ba objetivu Estadu nian ne’ebé hatuur iha Konstituisaun RDTL. Ne’e signifika entendimentu. La’ós ukun ida atu troka fali ida seluk ne’e hanesan samea troka kulit de’it”, nia katak.

Xefe Bankada PD ne’e nia esperansa mak atu ultrapasa situasaun ida-ne’e só dalan mak ne’e, partidu FRETILIN no CNRT mak iha meiu atu forma Governu ida no bele inklui sira ki’ik.

Nia afirma, partidu ki’ik sira se bele konsidera hanesan tempu tranzitóriu ba governasaun tinan tolu atu ramata ne’e, bele envolve mós partidu sira seluk ninian inklui PD nune’e viabiliza governasaun hodi hatudu imajen ida polítikamente ba públiku no mós ba komunidade internasionál kona-ba Timor ninia kontestu reál polítika nian.

Entretantu, Deputadu PD, Adriano do Nascimento preokupadu ho stuasaun rai-laran tanba Timor-Leste halo rekonsiliasaun ho Indonézia, maibé Timor nian difísl tebes.

“Ita halo rekonsiliasaun ho Indonézia bele, nusá mak ita ho ita atu halo diálogu hodi rezolve ita-nia problema labele”, nia kestiona.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here