Diretór Diresaun Nasionál Organizasaun Urbana Ministériu Administrasaun Estatál, Hermínio Moniz Ribeiro. Imajen Tatoli/Julia Chatarina

DILI, 11 fevereiru 2020 (TATOLI) – Publisidade ne’ebé durante ne’e monta iha estrada protokolu, iha munisípiu sira inklui Dili, hatuur iha Dekretu-Lei númeru 51/2016, 28 dezembru, katak tenke iha taxa ba atividade ne’e.

Diretór Nasionál Organizasaun Urbana Ministériu Administrasaun Estatál, Hermínio Moniz Ribeiro, informa kualkér atividade promosaun iha estrada públiku tama ba kategoria publisidade.

Nia dehan, tama tinan 2019, Governu konsege rekolla rendimentu kuaze $400.000 husi servisu publisidade.

“Iha tinan 2017, tanba hahú estabele taxa publisidade iha fulan klaran, ita hetan rendimentu pur volta $25.000 no iha 2018 ba tinan tomak hetan $210.000. Nune’e, konta husi 2017 to’o 2019, rendimentu publisidade iha Munisípiu Dili hamutuk $359.000”, tenik dirijente ne’e iha ninia knaar fatin, Caicoli, tersa ne’e.

Diretór ne’e haktuir, hafoin estabelese taxa ba publisidade iha 2017, Diresaun Nasionál Organizasaun Urbana mak toma konta ba servisu publisidade, maibé bainhira tama tinan 2020 servisu ne’e deskonsentra iha munisípiu hodi autoridade munisípiu rasik mak halo jestaun ba asuntu publisidade.

Nia subliña, entre servisu publisidade ne’ebé tama ona kuaze iha munisípiu hotu iha territóriu, publisidade iha Dili mak hetan rendimentu maka’as liu tanba servisu privada sira hotu konsentra iha Dili.

Hermínio informa tan, tipu publisidade ne’ebé durante ne’e monta iha estrada públiku sira mak hanesan publisidade liuhosi kartazes, panfletu, publisidade móvel, publisidade iha ar-Blimp, balaun, zepplin, insuplável, publisidade senora no publisidade demonstrasaun.

“Kuandu publisidade ne’e tau iha avenida ne’ebé hanesan estrada protokolu, ninia folin la hanesan kuandu ita monta iha rua. Daudaun ne’e, iha Dili laran barak liu mak sira monta iha avenida tanba avenida ne’e hanesan estrada protokolu”, nia akresenta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here