Emposada kargu xefia IADE asina dokumentu posse ne’ebé akompaña hosi MKAE interinu, Fidelis Manuel Leite Magalhães no Prezidente KFP, Faustino Cardoso, ne'ebé hala'o iha salaun IADE, Bebora, Tersa (11/02/2020). Imajen TATOLI/Antónia Gusmão.

DILI, 11 fevereiru 2020 (TATOLI) – Prezidente Komisaun Funsaun Públiku (KFP), Faustino Cardoso, husu ba emposadu kargu xefia sira husi Institutu Apoiu ba Dezenvolvimentu Emprezariál (IADE) atu sai servidór di’ak hodi serbí povu hodi hasa’e ekonomia rai-laran.

“Nu’udar servidór la’ós atu sai liurai, satán ba instituisaun IADE ne’ebé maka sempre ligadu ho autór ekonomia (hanesan mikro empreza sira), husu atu hatudu hanoin aas oinsá ajuda sira (emprendedór)”, Prezidente KFP hato’o iha serimónia tomada posse ne’ebé hala’o iha salaun IADE, Mandarin, ohin.

Nune’e Faustino Cardoso enkoraja atu servisu ho responsabilidade no onestidade. “Hatudu sentidu responsabilidade no kompromisu boa vontade atu oinsá maka asegura Funsaun Públika ida ne’ebé konserva prinsípiu meritokrasia, signifika sé de’it maka atu asume responsabilidade tenke hatudu an kompetente duni ba área ne’ebé maka nia konkorre. Prosesu tomak hatudu katak imi (emposadu) 24 ne’ebé ikus mai konsege konkista vaga sira ne’e, sertifika aan duni kompetente”, katak.

Diretór Ezekutivu IADE ne’ebé foin simu knaar, Filomeno Marcelino Belo, afirma bazeia ba dekretu lei númeru 24/2012 iha 4 jullu atribui kompetisaun ba IADE ho ninia vizaun, misaun no objetivu sira.

Vizaun IADE maka promove, kapasita, koordena, akompaña no dezenvolve setór privadu no kooperativa liuhosi Sentru Dezenvolvimentu Emprezariál (CDE, sigla portugés) atu kontribui ba promosaun no fortifika atividade ekonómika iha país ba dezenvolvimentu ekonomia Timor-Leste. Misaun IADE nian maka dezenvolve planu, programa no asaun sira ne’ebé atu apoia formasaun no promosaun ba emprezáriu mikro, pekena no médiu iha Timor-Leste.

“Objetivu harii IADE maka apoia polítika no programa Governu nian atu kapasita no haforsa dezenvolvimentu emprezariál mikro, pekena no médiu no kooperativa iha área promosaun, formasaun no kapasitasaun. Knaar ida ne’e todan tebes mai ita hotu liuliu ba emposadu sira”, nia dehan.

Tuir diploma ministeriál númeru 7/2019, 10 abríl, atribui estrutura jerál foun tuir nesesidade evolusaun serbisu IADE nian. Diresaun ezekutiva iha unidade rua, unidade apoia jurídiku no unidade apoia ekonomia. Diresaun Nasionál iha haat, departamentu 10 inklui xefe CDE iha munisípiu 11.

“Ba kargu xefia diresaun sira ne’ebé ohin simu knaar ida ne’e, husu nafatin ita-boot sira atu kontribui, mellora no mantein servisu ida di’ak, garante imparsialidade, no profisionalidade iha ida-idak nia diresaun no departamentu ho di’ak atu nune’e hodi kontribui ba vizaun, misaun no objetivu IADE nian”, adianta.

Serimónia toma posse ne’e, partisipa hosi Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, Prezidente Komisaun Funsaun Públika, Faustino Cardoso, funsionáriu IADE, no família emposadu sira.

Jornalista :  Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here