Prezidente Eleitu FFTL periodu 2018-2022, Francisco Jerónimo.

DILI, 11 fevereiru 2020 (TATOLI)—Prezdente Federasaun Futeból Timor-Leste (FFTL), Francisco Jerónimo hateten sira-nia parte liuhosi reuniaun hamutuk ho ezekutivu deside ona treinadór hosi Brazíl, Fávio Joaquim da Silva mak sei sai treinadór hodi kaer selesaun nasionál U-23 durante tinan ida.

“Iha fulan hirak liubá ami tuur diskute ona ho ezekutivu sira foti desizaun hodi halo aprosimasaun hili ema na’in-tolu maibé ikus mai ami deside ema na’in-ida hosi Brazíl. Nia mak sei kaer ita-nia selesaun nasionál seniór,” Francisco ba Agência Tatoli iha edifísiu FFTL, Bairro Formosa, Dili, tersa ne’e.

Nia dehan, preparasaun treinadór ne’e atu prepara jogadór sira hodi bele partisipa eventu internasionál Suzuki Cup ne’ebé sei hala’o iha setembru mai ne’e.

Tanba ne’e, tuir nia, treinadór refere sei to’o Dili iha 14 fevereiru agora.

“Treinadór ne’e 14 fevereiru agora to’o ona iha Timor. Ninia billete ami prepara ona. Bainhira nia to’o ami sei hasoru malu no fó kedas serbisu ba nia atu halo,” nia tenik.

Aleinde ne’e, FFTL mós sei husu ba Asian Football Confederation (AFC) atu iha posibilidade treinadór refere bele sai mós diretór tékniku iha federasaun hodi bele prepara kondisaun di’ak liután.

Entretantu, prezensa treinadór Brazileiru ne’e hodi troka treinadór sesante, Fabiano José Flora ne’ebé la susesu iha jogu Sea Games tinan kotuk.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here