Hakerek na'in Domingos da Costa

Hosi Domingos da Costa*)

Introdusaun

Lixu mak materiál restu ne’ebé ema la utiliza no ema lagosta ona hafoin liuhusi prosesu ruma hodi soe ba fatin-lixu. Ema halo definisaun ba lixu, haree husi grau la utiliza lixu ne’e (nian) rasik. Iha prosesu naturál, iha mós serteza katak laiha konseitu propriadu kona-ba lixu, só iha de’it mak produtu sira rezultadu husi ema-nia kreatividade no mudansa ba tempu ne’ebé mak akontese hodi rezulta lixu.

Lixu hanesan materiál sira ne’ebé maka ema serve para utiliza fali ou restu husi sasán sira ne’ebé maka ema uza tiha ona no nia la serve para atu utiliza fali. Lixu normalmente iha forma oin-oin ne’ebé maka mai husi fábrika indústria sira, fábrika biolójika sira, fábrika doméstika sira no fábrika espesial sira seluk no iha impaktu ne’ebé bele fó ameasa ba ema-nia saúde. Lixu sira ne’ebé bele kauza ba impaktu ambientál maka lixu sira ne’ebé la’os naturál katak lixu ne’ebé ema maka prodús.

Iha vida umanidade nia ezisténsia fó konseitu no definisaun ba ambiente, maka lixu iha klasifikasaun tuir nia espesie sira. Lixu klasifika sai parte ida husi realidade ita-nia ambiente maka maihusi aihan nia restu sira, surat-tahan sira, plastiku sira, borraxa sira, ai-kulit sira-nia restu, hena restu, metál nia restu sira, vidru nia restu sira, kerámika nia restu sira, no rai-rahun sira.

Ema halo diferénsia ba lixu hirak ne’e liuhusi nia karaterístika bázika biolojia no kímika mak hanesan:

Restu ou lixu ne’ebé dodok (orgániku): Ezemplu; restu ai-han, ai-tahan, lixu to’os nian, lixu agrikultura sira, no seluk-seluk tan.

Restu ou lixu ne’ebé difisil atu dodok ou ladodok (la orgániku) no ho ema-nia koñesimentu no ema-nia kreatividade bele halo resiklajen ou sunu bainhira ema iha intensaun atu hamenus lixu ou hakarak utiliza fila fali.

Restu ou lixu ho forma rai-rahun rezultadu husi kombustaun, lixu ida ne’e sai partikula ki’ik liu bele misturadu ho anin livre hodi bele tama iha kanál respirasaun to’o ikus bele hamosu moras iha vida umana.

Restu ou lixu ne’ebé perigozu liu ba saúde, ezemplu lixu indústria (materiál ho subtánsia toxikus ou veneno perigozu), lixu indústria iha kuantidade, konsentrasaun, ho natureza kímika, fizika no mikrobiolojia iha lixu nia kompozisaun, bele aumenta ou reforsa mortalidade no morbidez sai kauza ba moras oin-oin ne’ebé reversivel (bele kura) no ireversivel (labele kura) ho nia poténsia hamosu perigozu iha tempu agora ka tempu mak sei mai.

Ho hanoin simples no báziku sira ne’e, lixu mak butuk materiál restu ou uzadu hanesan ai-horis ou restu animál nia restu no sasán seluk ne’ebé mak atu soe. Ho hanoin kompreensivu, lixu mak sasán ne’ebé atu soe, tantu orijen husi natureza ou rezultadu prosesu teknolojia komposta solidu no la solidu.

Asenta husi karaterístika lixu nian, fahe ba lixu orgániku, lixu ne’e bele kontinua utiliza ba adubu. Lixu la organiku maka ezemplu plastiku uzadu ba empakotamentu aihan, surat tahan ou papel sira, plastiku ba brinkedu, garafa no vidru sira bebida nian, lata sira no seluk-seluk tan. Lixu la organiku hirak ne’e bele kontinua ba fa’an hodi sai fali produtu seluk ruma ou babain ema hateten lixu komersiál. Iha Timor-Leste, kategoria lixu ne’ebé daudaun ne’e sai lixu komersiál mak lata ou kalen, besi, aluminium, no bronze.

Lixu kategoria husi nia forma
Klasifikasaun residous ou lixu bazeia ba nia forma ou molda iha kategoria;

Lixu sólidu, lixu solidu maka prodús husi rezultadu atividade indústria ou atividade doméstika ne’ebé ho forma sólidu. Ezemplu; surat tahan, plástiku, poeira metálika, ai hu’ut, panu (hena) no seluk tan. Prosesu tratamentu ba residuo solidu fó diferensa tuir lixu nia utilidade, residuo sólidu ne’ebé bele halo resiklajen no labele halo resiklajen ou laiha ona nia utilidade. Residuos sira mak la util ona normalmente ema soe, sunu no hakohi.

Lixu líkidu, Residous Líkidu mak mistura entre kompozisaun fo’er ho bee mak dizolvidu ona. No líkidu sira ne’ebé uzadu ona, sai restu iha nia utilizasaun hodi soe ba fatin lixeira sira mak hanesan; Residus metan ne’ebé mai husi lixu líkidu casa de banho (Poço casa de banho) nian.

Lixu ida ne’e kompila ona ho patójenu (origem das doenças) ne’ebé perigozu. Residous líkidu doméstika mak lixu líkidu sira rezulta husi dapur, haris fatin, lavandaria, lixu ida ne’e posivel mós kompila ho patójenos. Kategoria ba residous líkidu sira mak, líkidu husi domestika, líkidu indústria, líkidu fábrika no udan-been (chuva).

Lixu gasosa, residuos gasosa mak lixu ne’ebé kontamina ona ho anin livre, no anin sai ponte ba tranferensia husi fatin ida ba fatin seluk. Naturalmente anin inkluindo ona ho elementus kímiku iha nia subtánsia mak hanesan CO2, O2, H2, seluk-seluk tan. Residuos gasosa ne’ebé kontamina iha anin livre hodi ultrapasa konteúdu subtánsia anin naturál sei fó redusaun ba kualidade anin ne’e rasik.

Lixu gazosa mak husik livre iha anin sei iha kontaminasaun, no sei rezulta negativu ba saúde ambientál. Substánsia lixu gasosa sira sai polusaun ambientál klasifika ba parte rua mak hanesan partikula no gazosa. Partikula mak elementu ki’ik liu husi subtánsia materiál ida-nia kompozisaun no iha posibilidade bele haree ho matan (fumo husi bee, rai rahun, ai su’ar, kalohan). Enkuantu kontaminasaun ho forma gasosa só bele de’it sente atravez husi respirasaun ema-nian.

Fatór influénsa ba produsaun lixu

Tratamentu lixu iha relasaun metin ho populasaun porque husi lixu refere sei moris mikroorganizmu hodi sai kauzalidade ba moras aat sira. Iha lixu mikroorganizmu sei moris mak hanesan bakteria no sai mós Patójenos ba populasaun ou komunidade nia ambiente. Portantu lixu merese duni hetan atensaun sériu no másimu hodi labele hamosu problema iha populasaun nia leet.

Ita konsiente katak kualidade no kuantidade lixu ekstremamente hetan influénsia liuhusi várias atividade no depende mós ba grau moris populasaun nian. Iha mós fatór importantísimu mak sai influénsia ba produsaun lixu, nomeadamente;

Kuantidade ba populasaun; Kada ves mais evolusaun em kuantidade ba populasaun entaun aumenta proporsional produsaun lixu ne’ebé makaas. Asuntu ne’e iha ligasaun no armoniza hela taxa aumentu ba populasaun iha urbana sira nomós zona rurál sira

Situasaun sosiál ekonomia; Situasaun sosiál ekonomia populasaun nian ne’ebé kontinua aas ba bebeik, sai pontu ida hodi kontribui ba aumenta produsaun lixu. Liu-liu lixu sira ho natureza difisil atu dodok (la orgániku), no iha aspeitu ne’e refere dependénsia liu ba materiál sira no alimentu sira preparadu husi loja no supermerkadu sira sempre ho embalajen.

Progresu teknolojia; Siénsia no teknolojia ne’ebé avansu makaas iha mundu ohin loron, sai mós fator ida iha aumentu kuantidade ba produsaun lixu iha sosiadade. Ambientalmente, konsiente katak progresu ba teknolojia fó adisionál iha kuantidade no kualialidade lixu tanba konsumu materia-prima ne’ebé oin-oin, maneira empakotamentu ou embalajem no produtu manufatura ou fabrika ne’ebé mak sempre mais aumenta.

Produsaun ba lixu ne’e hanesan produsaun ida ne’ebé Inevitável iha Sosiedade nia le’et, populasaun ne’ebé maka aumenta, lixu mós aumenta ba nafatin. Lixu ho populasaun sai hanesan kresimentu ne’ebé okupa espasu ba rai no nasaun sira iha mundu. Tanba ne’e, lixu sai hanesan preokupasaun iha sosiedade nia le’et.

Dispozisaun lixu la tuir regras sai hanesan problema ida ne’ebé grave tebes relasiona ho ambiente tanba sosiedade iha relasaun naturál ho ambiente no problema sira ne’e maka hanesan rai halai, poluisaun, lalubur, moras no seluk-seluk tan. Fator umanu sai hanesan sentru oinsá maka atu hamosu lixu no oinsá maka atu reduz lixu maibé ida ne’e fila fali ba situasaun no polítika estadu no sosiedade nian.

Lixu ba kontaminasaun ambientál sai preukupasaun prinsipál iha Dili no sidade sira seluk. Lixu ou restu ne’ebé aas liu mak lixu doméstika, tanba ne’e presiza duni iha jestaun ne’ebé di’ak no adekuadu. Haree husi kuantidade lixu kada família prodús; depende ba kustume uzu iha kada família ba nesesidade bazeia ba padraun moris, tempu ou iklima, diversidade populasaun, diversidade ba uzu, maneira kuidadu lixu. Hirak ne’e mak sai fatór sira iha família no ambiente ba produsaun lixu hodi fó influénsia iha sosiedade.

Iha Timor-Leste nomeadamente iha Dili no sidade sira seluk, seidauk iha métodu ou koñesementu propriadu ba utilzasaun lixu sai valór ekonómiku. Entaun fó mitigasaun (kelongaran) ba sidadaun maioria halo remosaun ba lixu ho maneira;

Soe lixu tuir luron ho arbiru, soe lixu iha kova (raikuak) ou rai kle’an, soe lixu iha rai ku’ak no taka fali rai ho dalas ba dalas hodi lixu la lekar iha fatin livre, soe lixu iha bee-dalan, mota no tasi, sunu lixu iha fatin la propriu hodi halo kontaminasaun no polusaun ba anin livre, uza lixu orgánika ba adubu no utiliza fila fali lixu balun ne’ebé sei bele uza seidauk sai ábitu iha sosiadade nia leet.

Impaktu lixu pormenor ba Saúde agrupadas ba parte efeitu moras direta no efeitu la direta. Signifikadu husi efeitu direitu mak efetu moras sira ne’ebé ema hetan liuhusi kontaktu direta ba lixu refere. Ezemplu, lixu ne’ebé ho karater Corrosivo (materiál ou lixu sira kuandu kontaktu estraga ita-nia kulit direta) ba ema-nia isin no seluk tan. Lixu domestiku sira lalais dekompostu ou dodok sei sai fatin moris bakteria patojeniku (parasite ne’ebé hamosu moras) ne’ebé sei hamosu moras oin-oin.

Enkuantu, efeitu la direta mak impaktu sira husi lixu maibé populasaun la sente direta iha tempu no espasu oras ne’e dadauk, kauza husi prosesu dekompozisaun (dodok), kombustaun (sunu) no remosaun (soe) lixu. Efetu la direta sira seluk mak forma doensa sira ne’ebé husi vector (lalar, laó ou insetu sira lori moras hodi hada’et) mak moris multiplika iha lixu nia laran.

Observasaun direta iha fatin montaun (butuk) lixu hatudu katak, lixu sai fatin suporta ba moska (lalar) hodi moris, lixu sai mós fatin suporta ou abrigu ba rato (laho), ne’ebé kada animál hirak ne’e lori moras no transfere ou hada’et ba ema ho moras oin-oin. Rezultadu dekompozisaun lixu fó cheiro (dois) ladi’ak ba anin livre, núne’e moó fó inpaktu ba saúde ambiental dentru kontaminasaun ba bee, rai no anin husi prosesu dekompozisaun lixu.

Impaktu husi lixu mós bele estraga Kresimentu ekonómiku Nasaun nian se ita haree ba área turizmu ninian. Bainhira tasi foer autómatikamente estraga beleza ba iha ambiente tasi nian ho nune’e sai hanesan fator ida ne’ebé maka estraga turísta sira-nia vizita iha Timor-Leste.

Estadu nia tulun ba tratamentu lixu

Maneja lixu engloba atividade sira similante; Redusaun, eskolla, kolesaun, utilizasaun, transporte, levantamentu, klasifikasaun no prosesamentu. Dala barak mak iha opiniaun tratamentu lixu haree husi aspetu rua nomeadamente estabelesimentu elaborasaun ba politíka prosesamentu lixu no ezekusaun levantamentu lixu. Lixu presiza trata ho prinsípiu no baze fundamentál ne’ebé kuda iha ema hotu nia konsiénsia com espesífika, mak Disiplina, Ijiéne, no beleza.

Konsiénsia ema-nian, ba infrastrutura ba tratamentu lixu no regulamentu ho nia sansaun sira, sai importante no depedente ba malu iha prosesu tratamentu ou jestaun ba lixu. Ho kondisaun nasaun ne’ebé maka foin moris hanesan Timor-Leste, foin maka harii ho prosesu konstrusaun estadu komesa husi fatór ekonómiku, agrikultura, infraestrutura no fator oioin ne’ebé maka foin dezenvolve.

Ho nune’e Timor-Leste nia ekonómia sei dependénsia ba iha importasaun husi nasaun sira seluk, iha konsumu doméstiku Timor-Leste nian, liuhusi materiál sira ne’ebé maka nasaun sira seluk eksporta mai Timor Leste.

Liuhusi produtu importadu sira ne’ebé maka populasaun Timor-Leste konsumu, Timor-Leste sai mós destinasaun ba iha lixu. Ezemplu, ne’ebé ita bele hetan maka ai-han sira ne’ebé fábrika husi nasaun importadór sira, sempre uza plástiku, lata, no substánsia sira seluk ne’ebé hodi uza ba empakotamentu ou embalajem.

To’o ikus blindajen ou kobertór sira ne’e sai lixu iha Timor-Leste. Kada tinan atividade importasaun husi nasaun sira seluk sempre kontinua no aumenta ba beibeik, ho nune’e lixu mós iha kuantidade dupla makaas ba iha ambiente Timor-Leste.

Implikasaun ida ne’e akontese tanba maioria ema barak maka seidauk iha konsiénsia kona-ba lixu nia influénsia ba ambientál. Jestaun ba lixu seidauk bele atende ho di’ak no abrajente, iha problema ambientál ne’ebé maka sempre akontese iha Timor-Leste.

Tinan-tinan ikus ne’e, husi parte Governu organiza eskola sira, organizasuan relijioza sira, ekipa funsionáriu públiku sira, sosidade sivil sira, no grupu sidadaun sira, halo asaun limpeza iha zona barak kapital Dili nian, no iha munisipiu Timor laran tomak.

Asaun sira ne’e mosu hafoin aumentu númeru fotografia sira ne’ebé maka mosu iha media sosáal sira, lalubur ou inundasaun lubuk ne’ebé involve edifisiu públiku sira iha kauza, populasaun soe lixu no akumula (butuk) iha dalan ninin, lixu barak akumuladu iha fatin-fatin, poluisaun makaas iha fatin-fatin, no akumuladu lixu liu-liu iha mota nian no iha kosteira marítimu nasaun ne’e nian.

Tanba ne’e, fim do mes kada loron-sexta sempre Governu organiza halo limpeza. Esforsu hirak ne’e hotu Governu halo no estabelese Sekretáriu Estadu Meiu Ambiente ne’ebé serbisu espesifika ba ambiente nian.

Ate orgaun nasaun nian ne’ebé kompetente ratifika regras internasionais lubuk no produz lei lubuk ba ambientál mak hanesan; Ratifika Konvensaun ambiente, konvensaun Biodiversidade, mudansa klimatika, kombate dizertifikasaun, konvensaun ozon, konvensaun protokolu Kyoto.

No, orgaun nasaun nia ne’ebé kompetente mós produz Lei Nú. 26/2012 kona-ba baze ambientál, Dekreitu lei Nú. 5/2012 kona-ba lisensamentu ambientál, diploma Governu Nú. 32/2017 kona-ba halibur lixu fó kompeténsia ba munisípiu sira. Maske esforsu Governu nian kontinua makaas atu trata lixu maibé lixu nafatin sai problema no fenomena sosiál ida iha Timor-Leste.

Tanba ne’e, meu sira ne’ebé parte Governu presiza kria ou halo hodi apoiu no konstroi tan mak oinsá lixu sai fontes ba reseita ekonomia no lixu la’ós sai dezastre ou kalamidade ambientál maibé lori sorte, atravesa lixu sai adubu ba produtu komersiál hodi troka adubu kímiku sira ne’ebé utiliza iha setor agrikula. Haree ba aspetu ekonómia sosiedade nian lixu sira bele sai fali materiál ida ne’ebé iha valór ekonomia iha família ida-idak.

Haree ba buat kiik husi lixu sira ne’ebé maka bele reutiliza fali populasaun sira bele tau hamutuk hodi ba fa’an fali ho nune’e bele utiliza fila fali. No, atu jestaun problema lixu sai fontes ba reseita ekonomia sidadaun nian, nesesariu duni harii ou suporta forma ba aspetu lei ou regra, institusionál jestaun ba lixu, partisipasaun populasaun iha jestaun, fundu no teknolojia. Só ho núne’e, duni maka jestaun ba lixu sai atividades ho sistematiku, akumuladu, no kontinuasaun ou sustentavel ne’ebé to’o ikus rezulta duni fó diminuisaun no iha duni manuseiu ba lixu mak sai problema ba públiku iha Timor-Leste.

Makdi’ak husi jere lixu ho di’ak

Oponiaun em jerál no tuir siénsia saúde ambientál nian, lixu kuando jere ho di’ak, bainhira lixu refere la sai fatin moris bakteria sira no la sai fatin hodi alargamentu moras oin-oin iha sosiedade. No, realidade seluk, kuidadu lixu jere ho di’ak mak lixu la kontamina iha anin livre, bee no rai, la hamosu cheiro (iis) negativu iha ambiente no la hamosu inséndiu no seluk tan.

No, dirijibilidade ba lixu ne’ebé di’ak sei iha proveitu boot ba vida umanidade no ambientál. Salvaguarda ambientál mak kontaminasaun ba bee-moos, rai, no anin. No, sei diminui kuantidade moris moska ou lalar no insektu sira seluk, ratu ou laó ne’ebé sei sai laletek ba transferénsia moras sira. Hodi evita mós estraga ba ponte, valeta, estrada, kanu ba bee-moos, inundasaun ou lalubur no seluk-seluk tan.

Makdi’ak husi jestaun lixu espesifikamente husi parte saneamentu, asegura no garantia fatin serbisu moos (limpu), prevene fatin moris ba bakteria no vektór, núne’e prevene polusaun ambientál. Parte ekonomia, hamenus kustu ba tratamentu no medikamentu, diminui kustu reparasaun ba estraga sira tanba lalubur tanba intupidu lixu iha kanal drainaje sira nian.

Parte estetika (beleza no pureza), elimina panorama sira la saudavel ba ema nia haree, hasees tia husi ambiente aparesimentu dois (cheiro) sira ne’ebé la di’ak, konserva nafatin sirkunstasia ambiente moos no inkontaminadu.

*) Hakerek na’in Estudante UNPAZ semester V

HAKEREK NO HATÁN

Please enter your comment!
Please enter your name here