Diretór Nasionál Kuarentena no Bioseguransa Ministériu Agrikultura no Peska (MAP, Venâncio Oliveira. Foto/Florencio Ximenes.

DILI, 10 fevereiru 2020 (TATOLI) – Diresaun Nasionál Kuarentena no Bioseguransa (DNQB, sigla portugés) Ministériu Agrikultura no Peska (MAP) halo apreensaun ba hahán hamutuk kilograma 70 hosi Indonézia iha Aeroportu Internasionál Comoro tanba laiha dokumentu

“Durante períodu servisu hamutuk atu prevene situasaun Coronavirus ne’e parte Kuarentena ami halo apreensaun ba sasán balu, maibé la’ós hosi nasaun afetadu hanesan Xina, más hosi Indonézia”, Diretór Nasionál Kuarentena, Venâncio Oliveira, ba TATOLI iha nia knaar fatin, Aeroportu Komoro, ohin.

Venâncio Oliveira dehan sasán ne’ebé prende mai hosi Indonézia tanba laiha dokumentu, nune’e maka DNQB konsidera hanesan sasán risku tuir medida Kuarentena.

“Ami halo apreensaun ba sasán sira ne’e la barak, kilograma 50-70, sasán sira ne’e mak hanesan na’an-manu, na’an-fahi, kuantidade ne’e menus tanba durante semana rua nia laran pasajeiru tama mós menus no sai mós menus”, subliña.

Nia esplika produtu saida de’it maka tama, tenke hetan lisensa autorizasaun antes lori tama, no tenke iha sertifikadu sanitáriu hosi nasaun orijen.

“Antes tama mós ami tenke identifika katak sasán ne’e livre atu hatama maka ami bele autoriza, sasán ne’ebé ami halo apreensaun tanba laiha sertifikadu sanitáriu ba produtu hirak ne’e, no laiha lisensa hosi Kuarentena”.

Entretantu, sasán sira ne’ebé DNQB halo apreensaun daudaun ne’e rai hela iha edifísiu Kuarentena iha Aeroportu Comoro, no sei halo destruisaun. Iha destruisaun ne’e, sei konvida mós sasán na’in sira ne’ebé balun sidadaun Indonézia no timoroan rasik

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here