Guarda Prizionál fo seguransa ba arguido nain rua husi kazu Kulu-hun bainhira lori ba tuir julgamentu iha TDD, tersa (01/10/2019). Imajen/Domingos Piedade

DILI, 10 fevereiru 2020 (TATOLI) – Governu liu husi Ministériu Justisa, rekoñese servisu Guarda Prizionál nian todan, maibé delikadu. Tanba ne’e, presiza iha atensaun no kapasitasaun atu bele mellora di’ak liu tan servisu todan ne’e.

Liu husi workshop ne’ebé organiza husi Ministériu Justisa (MJ), embaixada Japaun iha Timor-Leste, PRADET no Servisu Estabelesimentu Prizionál, ohin, iha Otél Timor, Dili, Ministru Justisa, Manuel Cárceres da Costa, énfaze katak,  Guarda Prizionál nia servisu todan, maibé delikadu  tanba loron-loron sira hamutuk ho prizioneiru sira, tanba ne’e, presiza hafoun nafatin sira-nia koñesimentu no hametin nafatin sira-nia mentalidade para sira serve prizioneiru sira iha prizaun.

Ministru Justisa, Manuel Cárceres da Costa. Imajen/Antonio Goncalves

“Ita-nia prizaun Becora over  ona atu akomoda ita-nia maluk ne’ebé mak kontra Lei. Agora prizioneiru 591 ona, maibé kapasidade akomodasaun tuir loloos ne’e 250. Iha Gleno 125 no Suai 90-resin,” hateten Ministru Manuel Cárceres.

Workshop ho tema “Jestaun ba Kriminozu atu Prevene Estremizmu Violentu (PEV) no Fortalesimentu Sistema Avaliasaun iha Prizaun sira” mai kedas husi akordu entre Ministériu Justisa ho Ministériu Justisa Japaun iha tinan 2019 hodi halo avaliasaun ba relatóriu no transmite  nafatin kapasidade intelektuál ba Guarda Prizionál sira.

Nia esplika, liu husi avaliasaun no relatóriu sosiál ne’e bele foti medida oinsá mak prizioneiru sira balu hetan indultu.

“Ha’u kontente tebes tanba workshop ida ne’e halo mós revizaun avaliasaun tanba liuhusi avaliasaun ne’e mak ita halo prosesu indultu maibé la’ós haree de’it ba lei maibé presiza mós relatóriu sosiál no servisu hamutuk ho PRADET no Provedoria Direitus Umanus Justisa (PDHJ) atu nune’e ita-nia Prezidente da Repúblika deside no fó indultu ba prizioneiru sira,” hateten Ministru Manuel Cárceres.

Iha fatin hanesan Diretór Nasionál Servisu Prizionaís no Reinsersaun  Sosiál, Amlicar Soares Seixas, informa, guarda Prizionál husi Becora, Gleno no Suai ne’ebé mak mai partisipa kolókiu ne’e hamutuk na’in 33 hodi hakbiit sira nia koñesimentu iha area temátiku kona-ba jestaun prevensaun risku no papél Guarda Prizionál sira ba antesipasaun terrorista iha prizaun laran.

“La’ós atu akontese maibé ita antesipa kedas ona atu nune’e prevene situasaun ne’ebé mak akontese,” hateten Amilcar Soares Seixas.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here