Prezidente Klube Académica FC, Gil da Conceição. Imajen/Espesiál

DILI, 10 fevereiru 2020 (TATOLI) – Prezidente Klube Académica FC, Gil da Conceição, hateten sira nia parte seidauk halo preparasaun ba époka 2020 tanba sei hein Kongresu Liga Futeból Amadora (LFA) ramata.

“Ami sei hein Kongresu Liga Futeból Amadora nian. Kongresu hotu mak ami foin bele hala’o preparasaun”, dehan Gil ba Agência TATOLI via Messenger, segunda ne’e.

Dirijente klube ne’e konsidera, desizaun Governu hodi hapara subsídiu ba klube sira sai hanesan problema boot, tanba ne’e atu tuir ka la tuir liga, klube sira sei tuur hamutuk hafoin deside.

“Ami tuir, naran katak subsídiu iha nafatin”, Gil argumenta.

Antes ne’e, Governu liuhosi Sekretáriu Estadu Juventude no Desportu, Nélio Isaac Sarmento,  deklara sei laiha subsídiu ba klube sira iha époka ida ne’e.

Kona-ba Kongresu LFA, sei realiza iha 21  marsu 2020 no daudaun ne’e komisaun tékniku LFA nian hala’o hela preparasaun.

Jornalista: Hortênçio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here