Diretór Klínika Bairro Pité, dr. Daniel Murphy. Imajen TATOLI/Egas Cristovão

DILI, 07 fevereiru 2020 (TATOLI) – Iha diskusaun meza redonda relasiona ho polítika saúde ninian,  Diretór Klínika Bairru-Pité, Doutór Daniel Murphy, informa iha janeiru 2020, klínika ne’e rejista moras Tuberculosis (TBC) hamutuk 28.

“Ha’u bele informa ba ita boot sira katak TBC bele oho ema Timór. La’ós oituan de’it maibé barak tanba iha janeiru 2020, Klínika Bairro Pité ba dahuluk hetan númeru 28 kazu ne’ebé pozitivu moras Tuberculose ka mear tasak”, dehan Daniel iha Salaun Cruz Vermelha Timor-Leste (CVTL), Bairro Formosa, sesta ne’e.

Daniel dehan, antes ne’e klínika ne’e nunka hetan moras TBC to’o númeru aas, maibé tama tinan foun ne’e hatudu katak moras ne’e aumenta ba beibeik.

Nia esplika, ema ne’ebé hetan pozitivu TBC ne’e perigozu tebes no da’et lalais ba ema seluk, bainhira loke ibun, me’ar no tafui iha ema normál nia oin mak mikróbiu ne’e fásil tebes atu estraga ema nia saúde.

“Tanba ne’e foin ba dahuluk ami hetan kazu hanesan ne’e.  Ami loron-loron haree pasiente TBC aumenta, ha’u bele dehan ha’u ódiu TBC ha’u la gosta TBC ha’u hakarak hatún TBC maibé moras ne’e matenek liu”, nia akresenta.

Diretór Klínika ne’e dehan tan, agora eziste tan aimoruk hodi fó ba pasiente sira mós laiha rezultadu, tanba ne’e atu hamenus TBC presiza fó programa ne’ebé ba kbiit feto sira atu bele organiza nível suku atu haree komunidade sira ne’ebé mear durante semana rua koko sira kaben tasak karik hetan pozitivu hodi bele fó ai-moruk ba sira hemu atu nune’e bele hatun TBC.

Nia informa,  iha Klínika Bairro Pité la’ós de’it moras TBC maibé iha mós moras  HIV- SIDA.

Diretór ne’e hatutan, aimoruk ba moras TBC no HIV-SIDA iha klínika rasik sufisiente maibé moras seluk sira araska.

Daniel subliña tan, aimoruk ne’ebé pasiente sira konsumu mai husi fundu globál no mós husi parseiru sira maibé kuandu multi rezistete ne’e difísil.

“Agora husi fundu globál hetan ai-moruk no hetan osan oituan, husu esmola $1 entaun loron ida ami bele hetan $100 ka $200 maibé la to’o tanba ami kontratu ema besik 100. Entaun ema hotu tenke hetan vensimentu”, nia dehan tan.

Nia hatutan, daudaun ne’e ema ne’ebé serbisu iha Klínika Bairro Pité voluntáriu hotu tanba orasamentu laiha atu selu sira.

“Orasamentu laiha ami araska tanba ema ne’ebé serbisu iha klínika ne’e voluntáriu de’it. Maske la simu osan, maibé ema profisionál sempre mai serbisu ami la iha osan atu selu enfermeira sira”, nia haktuir.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here