Prezidente FFTL, Francisco Jerónimo. Imajen Mídia FFTL

DILI, 07 fevereiru 2020 (TATOLI)–Iha sesta ne’e, Prezidente Federasaun Futeból Timor-Leste (FFTL), deside hala’o soru-mutuk ho klube ualu ne’ebé joga iha Liga Juvenil Timor-Leste (LJTL) hamutuk ho komisaun konjunta hodi ko’alia kona-ba desizaun ne’ebé foin lalais fó-sai ona ba públiku relasiona ho prémiu ba primeiru lugár iha Liga refere.

“Enkontru ohin ne’e hala’o atu foti desizaun ba prémiu Liga Juvenil nian. Foin lalais ha’u-nia maluk sira hosi komisaun konjunta ne’ebé lidera Liga aprezenta proposta mai. Maibé, desizaun hosi ami seidauk fó-sai sira publika ona ba públiku no sira haluha tiha katak FFTL ne’e sei iha ema ida atu deside lolos ba desizaun ne’e iha regra. Entaun, ami hala’o fali reuniaun ida hodi deside katak labele hanesan ne’e. Desizaun ne’e seidauk loos,” Prezidente FFTL, Francisco Jerónimo tenik iha edifísiu FFTL, Bairru Formosa, Dili, ohin.

Nia hatutan, atu finansiamentu buat hotu ba LJTL tenke liu hotu hosi FFTL.

“Ita haree hanesan uluk ami fó rihun $150 ba Liga Futeból Amadora. Ne’e ami fó liu ona. Maibé, Liga Juvenil nian ne’e sira laiha ona osan entaun buat hotu mai hosi FIFA no AFC. Ita tenke foti desizaun sira ho fuan boot atu asume responsabilidade tuir kbi’it ne’ebé mak loos. Entaun mak ohin ami tenke ko’alia halo didi’ak para rezolve,” nia esplika.

Tanba ne’e, prémiu ba klube ne’ebé hetan primeiru lugár sei simu $4000, segundu lugar $3000, terseiru lugár $2000. Enkuantu, kuartu lugár to’o kraik sei simu $1000.

“Ita hahú jogu ne’e laiha kritéria ida atu halo apuramentu ka lae! Se ita ko’alia amdora ne’e ita la presiza buat barak ida. Maibé, federasaun ami iha responsabilidade kontinua apoiu nafatin,” nia subliña.

Entretantu, antes ne’e, komisaun konjunta liuhosi Koordenadór Jerál LJTL, Diogo Neto hateten prémiu ba klube primeiru lugár sei simu trofeiu ida osan hamutuk $4500 no sertifikadu.

Aleinde ne’e, komisaun deside atu oferese mós sertifikadu no insentivu $500 ba ema ida mellór markadór no mellór jogadór. Enkuantu, komisaun sei deside klube ida atu sai hanesan fair play time no sei intrega insentivu loos de’it hanesan osan $1000 no sertifikadu.

Fó hanoin fali, orsamentu ba realiza Liga refere tulun hosi Asian Football Confederation (AFC) no Federation International Football Association (FIFA).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here