Rui Carapinha. Imajen Tatoli/Egas Cristóvão

DILI, 07 fevereiru 2020 (TATOLI)–Oan-mane hosi Saudozu Jorge Tomas Godinho Carapinha “Maulelo”, Rui Carapinha, hasoru-malu ho Prezidente Repúblika, Francisco Guterres Lú Olo, fó agradese Estadu Timor-Leste ne’ebé konsidera ona Saudozu ‘Mau-Lelo’ nu’udar eroi nasionál, hodi hakoi saudozu nia restu mortál iha Jardim dos Herois da Pátria Metinaro, Dili.

“Ha’u mai iha-ne’e, atu agradese ba Prezidente Repúblika, Francisco Guterres Lú Olo no entidade hotu ne’ebé kontribui ona ba prosessu transladasaun mate-isin ha’u-nia aman nian, husi Portugal no Estadu deside hodi haloot ona iha Jardim dos Herois Metinaro iha tinan kotuk. Aleinde ne’e, prosesu tratamentu ba ha’u-nia aman nia dokumentu sira atu hetan ninia direitu husi Estadu Timor-Leste, kompletu ona. Tanba ne’e, ha’u agradese ba Prezidente Repúblika, ba Estadu no povu Timor-Leste (TL) ne’ebé rekoñese ha’u-nia aman nia kontribuisaun ba luta independénsia Timor nian. Lori família matebian nian, ne’ebé hela iha Portugál agradese ba Estadu Timor Leste”, Rui Carapinha hato’o lia hirak-ne’e, hafoin hasoru-malu ho Xefe Estadu iha Palásiu Prezidente Nicolau Lobato, Bairru Pité, Dili, ohin.

Entretantu, komunikadu ne’ebé fó-sai husi Prezidénsia Repúblika hateten Prezidente Lú Olo konsidera devér Estadu nian atu identifika no dignifika ema hotu ne’ebé kontribui ba prosesu luta ukun rasik-an. Tanba ne’e, Estadu maka agradese ba família Saudozu Carapinha, ne’ebé tuir Xefe Estadu iha direitu atu hetan ónra haloot iha Jardim dos Herois da Pátria Metinaro.

Jorge Tomás Godinho Carapinha ‘Mau-Lelo’ , nu’udar funsionáriu husi Portugal ne’ebé serbisu iha repartisaun korreiu, telégrafu, telefone no Obra Públika iha tempu koloniál Portugés, hosi tinan-1950 to’o invazaun Indonézia, iha 1975.

Mau-Lelo kontribui ba formasaun polítika iha União Nacional dos Estudantes Timorense (UNETIM) hodi ejize demokratizasaun sistema edukasaun. Nu’udar profesór nia dudu estudante timoroan sira atu tama iha UNETIM hala’o polítika.

1974/1975, saudozu halo parte iha fileira Partidu Associação Social Democrática Timorense (ASDT)-FRETILIN, hanesan Vise-Sekretáriu iha Komité Sentrál FRETILIN.

Funu sivíl ne’ebé akontese, União Democrática Timorense (UDT), kaer Mau-Lelo hamutuk ho Vicente Reis ‘Sahe’ hodi kastigu iha Palapasu, Díli. Hafoin sai hosi kadeia União Democrática Timorense (UDT) nian, saudozu hamutuk ho líder CCF refujia ba Aileu, Suku Asirimou, hamutuk ho líder FRETILIN hanesan Nicolau Lobato ho Marí Alkatiri.

Iha loron-20 agostu 1975, sai hanesan loron kontra-golpe ne’ebé organiza hosi militár timoroan sira, ne’ebé integradu iha ezérsitu portugés nian. Iha 28 novembru 1975, saudozu partisipa iha serimónia Proklamasaun Independénsia nu’udar membru CCF.

Iha okupasaun Indonézia, loron-7 fulan-dezembru 1975, Saudozu Carapinha, Forsa invazór sira kaptura nia no sai prezu. Durante iha prizaun, simu torturasaun oioin hosi forsa indonézia maibé soldadu invazór sira la konsege oho no lori nia ba prizaun edifísiu Tropical, agora Otél Plaza. Hafoin liu tiha loron hirak nia laran, lori fali saudozu ba Komarka Balide. Iha Komarka Balide, nia hetan tortura oioin hosi soldadu invazór sira, halo interrogatôriu oioin iha edifísiu Shan Thai Ho, agora Western Union, ne’ebé halo nia hetan sofrimentu fíziku grave tebes to’o nia mate iha 1981 no hakoi iha Simitériu Santa Cruz, Díli.

Iha Loron Nasionál Memória, 7 dezembru 2019, iha Jardim dos Herois, Prezidente Repúblika, Francisco Guterres Lú Olo hateten: “Istória ida-ne’e, hatudu katak raan husi sidadaun Portugés ida-ne’e, rega mós rai doben ida-ne’e atu sai livre no independente! Ninia raan kahor ho timoroan no sidadaun estranjeiru sira seluk nian, ne’ebé mate iha tinan rua-nulu resin haat nia laran, balun naran sai koñesidu ona, balun seidauk.”

Mau-Lelo nu’udar portugés id- ne’ebé mate ba kauza Timor-Leste ninian, Prezidente Repúblika hateten: “Domin husi ema ba ema laiha fronteira. Nia hahalok fó-hanoin polítiku vizionáriu boot ida, Che Guevara, sidadaun Arjentinu ne’ebé sai sidadaun mundu nian. Che Guevara kaer knaar oioin ho responsabilidade aas iha Governu Cuba. Nia husik Cuba iha 1965 tanba deside lori nia mehi ba oin, nu’udar kombatente internasionál, iha rai oioin, iha Áfrika no Amerika Latina. Militár Bolívia nian kaer no tortura maka’as Che Guevara to’o nia hetan mate iha rai ne’ebé la’ós nia moris-fatin.”

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here