Atividade rejistu labarik iha Postu Administrativu Baucau Vila, Munisípiu Baucau. Imajen/DNRN

DILI, 07 fevereiru 2020- Diresaun Nasionál Identifikasaun Sivíl no Rejistu Kriminál(DNISRK) husi Ministériu Justisa, dadaun ne’e, fó ona atendementu hodi emita kartaun Billete Identidade (BI) ba labarik sira.

Diretór Nasionál DNISRK, Victor da Costa Neto. Imajen/Osória Marques

Diretór DNISRK, Victor da Costa Neto, informa, antes ne’e, diresaun forñese BI ba de’it labarik husi tinan 12 ba to’o ema boot, maibé dadaun ne’e bele atende mós labarik husi tinan 0 tanba instala ona sistema foun.

“Momentu ne’ebá ami atende populasaun ho idade 12 ba leten de’it,” informa Diretór Victor da Costa Neto ba Agência TATOLI iha nia servisu fatin, ohin, iha Bebora Dili.

Nia esplika rajaun la emite BI ba labarik tinan 0-1 antes ne’e tanba sistema maka rejeita maibé agora di’ak ona tanba servisu tékniku sira halo ona manutensaun ba sistema ne’ebé kria ona iha DNISRK.

Kampaña Rejistu Labarik husi UNICEF. Imajen/UNICEF

“Depois ami halo manutensaun ba ekipamentu no agora ami mós bele fó atendementu ba labarik sira,” tenik Diretór ne’e.

Kritéria ba labarik kiik sira  hodi  hetan BI maka, aplikante sira tenke lori sertidaun moris ho dokumentu inan-aman nian.

DNISRK, iha tinan 2018  fó ona atendementu ba labarik sira ho tinan 12 ba leten hodi hasai sira-nia billete identidade, maibé labarik sira ne’ebé halo rejistu menus tanba falta informasaun.

“Dadus labarik idade husi 12-16 iha tinan ne’e, ami rejista iha rejistu kriminál hamutuk 286 kompostu husi feto  na’in 156 no mane 130,” hateten Victor da Costa Neto.

Jornalista   : Osória Marques

Editór         : Francisco Simões

HAKEREK NO HATÁN

Please enter your comment!
Please enter your name here