ohin,sexta 7/02/20 ADT realiza semináriu munisipal ho tema"dezenvolve Administrasaun suku hanesan xave ba dezenvolvimentu nasionál iha salaun Eskola Sekúndaria Dom Basilio Laclubar. Imajen Tatoli/ Nelson Sousa

LACLUBAR, 07 fevereiru 2020 (2020)-Asosiasaun Hadomi Timor (AHT), sexta (07/02/2020), konklui formasaun ba Autoridade Lokál no Konsellu Suku 31 hosi Postu Administrativu neen iha Munisípiu Manatuto kona-ba sistema administrasaun suku.

Tanba formasaun ne’e hahú ona iha loron 07 fulan-setembru 2019, no termina sexta ohin,  iha edifísiu Eskola Sekundáriu Dom Basílio do Nascimento Laclubar.

Diretór Organizasaun AHT, Manuel Boavida Hornai Soares, informa  materia ba formasaun ne’e foku liu ba sistema administrasaun suku atu oinsá kria planu,foti desizaun to’o ninia implementasaun, atendimentu ba komunidade, podér no kompoténsia no seluk tan.

“Programa ne’e bele hatutan programa Ministériu Administrasaun Estatál (MAE)  ne’ebé iha tiha ona no espera ho formasaun ne’e bele apoiu polítika governu nian ba dezentralizasaun administrativu no podér lokál, prepara rekursu umanu munisípiu atu dezenvolve administrasaun suku ho di’ak liután,”dehan Diretór AHT ba TATOLI iha Laclubar,ohin.

AHT iha nafatin komitementu atu servisu hamutuk ho MAE hodi oferese mós formasaun hanesan ba Autoridade Lokál no Konsellu Suku hosi munisípiu sira seluk iha futuru.

Iha biban hanesan Administradór Postu Administrativu Laclubar, Natalino Martins Carvalho, agradese ba organizasaun sosiadade sivíl ne’e no konsidera importante atu hadia di’ak liután servisu administrasaun suku nian.

Nune’e mós Xefe Suku Orlala, Postu Administrativu Laclubar, Carlos José Alves, rekomenda ba governu atu hadia kondisaun infraestrutura suku no ekipamentu sira hodi fó atendimentu di’ak liután ba komunidade.

Entertantu,Asosiasaun ne’e hetan apoiu fundu hamutuk rihun $ 15 hosi Gabinete Apoiu Sosiedade Sivíl, Primeiru Ministru iha tinan 2019.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here