Sekretáriu Estadu Protesaun Sivíl, Alexandrino Xavier Araújo foto hamutuk ho membru ASERD-TL iha ámbitu workshop nasionál hodi dezenvolve planu estratéjiku jestaun risku dezastre, ohin, iha salaun Esperansa, Delta, Dili. Imajen/Nelson de Sousa

DILI, 06 fevereiru 2020 (TATOLI)-Asosiasaun Servisu Redusaun Jestaun Risku Dezastre Timor-Leste (ASERD-TL) realiza workshop Nasionál ida hodi define planu estratéjiku jestaun dezastre naturál ba periodu 2020-2025, liliu halo prevensaun ba komunidade kona-ba risku dezastre.

Workshop ne’e hala’o durante loron rua; hahú ohin to’o aban (06 to’o 07 fevereiru 2020), iha salaun Esperansa, Elemloi, Delta Dili.

Koordenadór Ezekutivu ASERD-TL, Carlos Gonsalves, informa sorumutu ne’e atu dezenvolve planu estratéjiku ida atu sai matadalan ba organizasaun hodi halo prevene komunidade hosi risku dezastre naturál iha territóriu Timor-Leste.

“Programa ne’e trasa hotu sei hahú implementa duni iha tinan ida ne’e hamutuk ho komunidade iha baze liliu ba jestaun risku dezastre naturál,” katak nia ba jornalista sira.

Nia afirma, organizasaun ne’e iha kometimentu atu servisu hamutuk ho Sekretáriu Estadu Protesaun Sivíl (SEPS) hodi tulun governu atu prevene politika ba prevensaun dezastre naturál.

Iha fatin hanesan Sekretáriu Estadu Protesaun Sivíl, Alexandrino Xavier Araújo, apresia ho programa organizasaun ASERD nian tanba sosiade sivíl no parseiru internasionál sira hola papel importante ba prosesu dezenvolvimentu.

Workshop ne’e partisipa hosi membru ASERD-TL iha Munisípiu 12 no Rejiuan Autónomu Espesiál Oé-Cuse Ambeno (RAEOA) hamutuk ema na’in 30-resin.

Organizasaun ASERD harii iha tinan 2017 hodi sai mahon ba organizasaun sosiedade sivíl sira ne’ebé servisu ba prevensaun risku dezastre naturál iha Timor-Leste.

Jornalista : Nelson de Sousa

Editór      : Francisco Simões

HAKEREK NO HATÁN

Please enter your comment!
Please enter your name here