Masin-midar iha armazein Perissos, Fatuhada. Imajen/Antónia Gusmão.

DILI, 06 fevereiru 2020 (TATOLI) – Ekipa Autoridade Inspesaun no Fiskalizasaun ba Atividade Ekonómika, Sanitária no Alimentár (AIFAESA) identifika Empreza Perissos troka saku masin-midar ne’ebé liu ona prazu hodi fa’an fali.

Nune’e, ekipa AIFAESA deside hodi hapara kedas atu labele fa’an ona ba loja sira ne’ebé sosa, no haruka empreza tau ketak produtu importadu ne’e.

Iha inspesaun dahuluk ne’ebé AIFAESA halo, haree katak produtu ne’e liu ona prazu no halo tiha selajen (segel), maibé iha inspesaun ne’ebé ohin halo tan ba armazein Perissos nian iha Fatuhada, Postu Administrativu Dom Aleixo, Dili, identifika katak masin-midar ne’ebé empreza rai liu ona prazu, maibé kompañia ne’e troka tiha de’it saku foun hodi nafatin fa’an.

Tanba ne’e, Diretór Departamentu Operasionál, Gabriel da Costa, lamenta tebes ho aktu empreza Perissos nian no konsidera komete krime foun.

“Produtu sira ne’e antes ami-nia ekipa segel ona, maibé ohin ami mai fali halo observasaun ami haree katak sira tau fali de’it produtu ne’e iha karon seluk katak troka de’it karon maibé produtu ne’e nafatin hela. Hahalok ne’e ami konsidera sira komete krime foun tanba sasán ne’ebé autoridade halo selajen ona labele atu muda sai, bainhira muda tenke informa ba autoridade hodi mai haree”, Gabriel da Costa dehan.

Relasiona ba hahalok ne’e, Gabriel da Costa dehan autoridade foti auto notísia hodi kontra estabelesimentu refere.

Diretór Empreza Perissos, James Jong, klarifika produtu sira ne’e laliu prazu no rejeita mós katak la troka karon (saku).

“Iha inspesaun uluk sira dehan atu lori bá soe iha dezembru 2019 ne’e, balu maka soe no balu sira segel tiha, masin-midar balu di’ak tau hamutuk ho masin-midar balu iha karon más kuak. Ne’ebé ha’u dehan katak masin-midar sira ne’e seidauk liu prazu tanba foin hatama mai iha dezembru 2019, ne’ebé sei bele uza, iha tinan ne’ebé sira haree 2019 ne’ebé sira hanoin liu ona prazu más iha 2019 ne’e tinan produsaun”, esklarese.

Entretantu, ekipa AIFAESA halo inspesaun ba armazein Perissos nian hamutuk haat.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here