Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu. Imajen Tatoli/Egas CristovãoEgas Cristovão

DILI, 05 fevereiru 2020 (TATOLI)  – Governu liuhosi reuniaun Konsellu Ministru (KM) aprova Dotasaun Orsamentu Temporária (DOT) ba fevereiru 2020 ho montante $116.449.057.

Ministru Estadu Prezidénsia Konsellu Ministru, Hermenegildo Augusto Cabral Pereira, informa Ministra Finansa ein ezersísiu, Sara Lobo Brites, aprezenta Projetu Deliberasaun kona-ba tetu orsamentál fevereiru iha ámbitu rejime duodesimál.

“Montante totál despeza fahe ba kategoria haat hanesan saláriu no vensimentu $17.852.067, bens no serbisu $38.614.980, transferénsia públika $26.591.048, no kapitál dezenvolvimentu $33.390.953, nune’e ninian totál $116.449.057”, tenik governante ne’e iha Palásiu Governu, kuarta ne’e.

Utilizasaun rejime duodesimál sura hosi prosesu aprovasaun Proposta Lei Orsamentu Jerál Estadu (OJE) 2020, ne’ebé seidauk konklui no la tama vigór iha 1 janeiru 2020.

Nune’e, rejime ne’e sei ramata automatikamente bainhira orsamentu 2020 tama iha vigor.

Antes ne’e, DOT ba janeiru 2020 ho valór millaun $116.4, ne’ebé fahe ba kategoria saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6 no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here