DILI, 05 fevereiru 2020 (TATOLI) – Asidente tráfegu entre motór rua ne’ebé akontese iha área Akanunu, Suku Hera, tersa kalan (04/02/2020), tuku 22:00 Otl, rezulta ema na’in rua mate fatin no na’in rua seluk kanek todan.
Sira na’in rua ne’ebé mate maka Sebastião de Maia (lori motór) no Florindo da Costa Ricardo, hela iha Aldeia Mota Ki’ik, Suku Hera, Postu Administrativu Metinaro, Munisípiu Dili.
Na’in rua ne’ebé mate kondús motór Mio-Z 125cc, xapa G.2609 mai husi diresaun Hera soke malu ho Remigio Pinto no Ruben Freitas, ne’ebé sofre kanek todan hela iha Aldeia Hali Dolar, Suku Hera, kondús motór Honda Reve Xapa I.0811 husi Dili atu ba Hera.
Akontesimentu ne’e kauza husi kondús motor ho velosidade másima hodi rezulta kondisaun Sebastião de Maia no Florindo da Costa Ricardo, ulun nakfera no kanek todan tanba pankada makas. Enkuantu na’in rua seluk ne’ebé kanek agora hala’o tratamentu intensivu iha Ospitál Nasionál Guido Valadares (HNGV).
“Asidente ne’e vítima rua mate kedas no rua kanek todan,” informa Segundu Komandante Polisia Munisipiu Dili, Superintendente Xefe, Euclides Belo, ohin, ba jornalista sira.
Euclides Belo apela ba joven sira bainhira kondús karreta no motór tenke kontrola aan hodi evita asidente no insidente.
Jornalista : Eugénio Pereira
Editór : Francisco Simões