Prezidente Autoridade Munsípiu Dili, Gaspar Soares ho Xefe Suku Kampu Alor, Alcina Carvalho Santos, koalia ho komunidade Kampu Alor, molok sobu baraka sira iha Kampu Alor, Dili, 04 janeiru 2020. Imajen/Eugénio Pereira

DILI, 04 fevereiru 2020 (TATOLI)- Prezidente Autoridade Munisípiu Dili (ADM) Gaspar Soares, klarifika katak, governu labele fó indemnizasaun ba komunidade uma kain 70-resin ne’ebé harii baraka iha Kampu Alor, Dili, tanba durante ne’e sira okupa rai Estadu no  la selu taxa ba Estadu.

Notísia Relevante : Dezempregu Foun iha Kampu Alor

Nia dehan, governu atu fó indemnizasaun ba povu tenke haree husi aspetu no razaun forte, bainhira negosiante Indonézia sira aluga fatin ne’e durante tinan barak, maibé komunidade sira selu taxa arrendamentu rai nian ba estadu.

Prezidente Autoridade Munisípiu Dili, Gaspar Soares. Imajen/Tatoli

“Governu tenke iha razaun fundamentál maka bele fó indemnizasaun, tanba barraka sira ne’e povu rasik rekoñese harii ilegálmente iha rai Estadu no uma sira ne’e la iha arrendamentu ba rai Estadu,” hateten Gaspar Soares, ohin, hodi responde jornalista kona-ba preokupasaun no lamentasaun komunidade Kampu Alor sira nian ne’ebé la simu desizaun Governu sobu sira nia baraka la ho tratamentu ida justu.

Gaspar dehan, ba povu balun karik durante ne’e iha karta no selu taxa ba Estadu bele hato’o karta ho evidénsia ba Autoridade Munisípiu Dili para bele fó indemnizasaun.

Notísia Relevante : Sobu Baraka Kampu Alor, Povu La Kontente ho Prezidente Autoridade

Gaspar hato’o agradese mezmu mosu dezentendimentu maibé povu sira konsege koopera hodi sobu baraka sira ne’ebé harii iha rai Estadu no rai privadu nian balun.

Antes governu atu sobu baraka sira ne’e, Administrasaun Munisípiu Dili rasik mós hasai ona avizu iha loron 23 janeiru 2020 hodi sobu baraka negósiu ne’e.

Tuir planu governu, hafoin sobu baraka sira ne’e sei harii fali jardín no planu atu konstrui fatin estasionamentu hodi fasilita komunidade Musulmanu sira ba hala’o atividade reza iha Mesquita An’nur.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here