Ministru Justisa, Manuel Cárceres da Costa, fahe sertifikadu ba sidadun portuguesa ida ho naran Guilhermina dos Santos Lobo de Araújo nu'udar dr. Abilio Aroujo nia espoza hodi sai sidadaun naturalizasaun TL. Imajen/Domingos Piedade

DILI, 04 fevereiru 2020 (TATOLI) -Sidadaun estranjeiru na’in 129, ohin, ofisiálmente simu dokumentu legal husi Ministru Justisa (MJ), Manuel Cárceres da Costa, hodi sai hanesan sidadaun naturalizasaun Timor-Leste.

Sidadaun estranjeiru sira ne’e, mai husi nasaun  hitu (7), kompostu husi sidadaun Indonézia na’in 120, Portugal na’in haat (4) Brazil (1), Afeganistaun (1) Cuba (1),  Pakistaun (1) no India na’in ida (1).

“Estadu TL liu husi Ministru Justisa, marka tan istória foun ida hodi aumenta tan ninia ema sira ou sidadaun estranjeiru hamutuk 129 ne’ebé mak sai ona Timorense liu husi dalan kazamentu no naturalizasaun,” hateten Ministru Manuel Cárceres da Costa, iha nia diskursu iha ámbitu serimónia atribui sertifikadu notariadu nian ba sidadaun estranjeiru hirak nee  iha Edifísiu Notariadu, Mandarin, Dili.

Ministru Justisa afirma katak desizaun ne’e bazeia ba Konstituisaun, artigu 3 númeru 1 sidadania husun (adquirida), no artigu 11 aquizasaun nasionalidade liu husi dalan naturalizasaun, lei nasionalidade, lei númeru 09/2002, 05 de Novembru no bazeia ba referénsia no baze legal  Ministériu Justisa liu husi Diresaun Geral dos Serviços dos Registos e do Notariado.

“Ha’u hatene katak ita boot barak mak hela kleur ona iha TL, balun sai ferik no katuas tan oan, maibé buat hothotu tenke lao tuir regra no prosedimentu ne’ebé mak vigor iha ita nia rain TL,” esplika Manuel Cárceres da Costa.

Iha biban hanesan, Guilhermina dos Santos Lobo de Araújo husi Portugal nu’udar Abílio Araújo nia espoza, sente kontente no agradese tebetebes ba estadu Timor-Leste tanba dezde 1994 kedas trata atu sai sidadaun TL.

Nia hatutan, dezde tinan 1974, foin ba dala-uluk mai iha Timor-Leste, ikus mai hola Abílio Araújo, hodi fó kontribuisaun oioin ba luta TL.

Jornalista : Domingos Piedade Freitas

Editór        : Francisco Simões

HAKEREK NO HATÁN

Please enter your comment!
Please enter your name here