James Dunn. Imajen espesiál

DILI, 04 fevereiru 2020 (TATOLI)—Parlamentu Nasionál (PN), aprova votu pezár ba Eis Konsuladu Austrália mai Timor-Leste, James Stanley Dunn. James Dunn hakotu iis iha 01 fevereiru 2020 iha Austrália.

Parlamentu Nasionál aprova votu pezár ba James Dunn ho votu a-favór 53, kontra 0 no abstensaun 0. Votu pezár ne’e dirije hosi Prezidente Parlamentu Nasionál En-ezersísiu atuál Vise-Prezidente Parlamentu Nasionál, Maria Angelina Lopez Sarmento.

James Dunn moris iha Bundaberg, Queensland, Austrália iha 6 janeiru 1928. Iha tinan 1962 to’o 1964 hala’o funsaun hanesan diplomátiku (konsuladu) iha tempu Timor Portugés.

Nune’e, iha tinan 1977, James hala’o misaun importante hosi Austrália hodi buka hatene kazu krime sira ne’ebé akontese iha Timor.

Deputadu Partidu Demokrátiku (PD), Mariano Assanami ‘Sabino’ konsidera lakon tan ema solidariedade ida-ne’ebé ke fó nia tempu tomak iha momentu ne’ebé povu Timor hasoru risku, maibé James sempre defende povu Timor-Leste

“Timor-Leste nu’udar nasaun ida independente, agora ita tenke rekoñese ema hotu-hotu ne’ebé ke kontribui ba rai ida-ne’e nia independénsia. Sira la’ós moris nu’udar timoroan maibé sira-nia espíritu, sira-nia tempu no determinasaun hanesan eroi Timor nian. Ohin, ita fó votu pezár ba James Dunn ne’ebé maka tempu naruk nia hamutuk ho ita ba Timor-Leste nia di’ak”, Deputadu Assanami espresa liuhosi plenária Parlamentu Nasionál, tersa ne’e.

Deputadu Bankada Parlamentár PD ne’e afirma, Timor-Leste fahe libertasaun nasionál ne’e ba libertasaun povu no pátria.

“Agora, ita iha faze libertasaun povu, ne’e maka sei la’o nafatin no tula iha ita-nia kbaas katak ita hotu tenke hiit todan ne’e to’o realiza mehi ne’ebé maka la’ós Timor-Leste de’it maibé solidariedade ne’e inklui James Dunn ne’ebé ohin Timor-Leste lakon. Ita hotu nia orasaun akompaña nia iha Nai Maromak nia sorin kuana para atu tulun nafatin ita”, nia katak.

Entretantu, Deputadu Bankada Parlamentár FRETILIN, David Dias Ximenes haktuir katak uluk James hatudu solidariedade ba povu Timor-Leste iha funu laran, tanba ne’e James husik ona mundu, Timor-Leste tenke rekoñese ninia kontribuisaun.

“Ema estranjeiru sira hanesan ne’e ita iha obrigasaun para loke ita-nia an. Tan ne’e maka ami sai proponente hodi fó votu pezár ba James dunn”, nia tenik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here